Пэн Дая Хятадын Өмнөд Сүн улсын Цзянси мужийн Гуян-гийн хүн. Сүн улсын Шаодингийн 5 дугаар онд (1232) Монгол улсад элчээр ирж өөрийн үзсэн харсандаа тулгуурлан “Хар Татарын хэргийн товч” хэмээх номыг бичиж үлдээжээ. Уг ном нь монголчуудын улс төр, цэрэг дайны жагсаал, эдийн засаг, ёс заншил зэрэг дэлгэрэнгүй агуулгыг багтаасан байна. Пэн Даяа бас Сычуань мужийн Амуулан тохинуулах дэд түшмэл болж монголын цэргээс сэргийлэн Чунцин хотыг байгуулжээ. Зарим мэдээг үндсэлбэл 1240-өөд оны үеэр Монголд элчээр ирсэн мэдээ байна. 1926 онд монголч эрдэмтэн Ван Говэй “Хар Татарын хэргийн товч” гэдэг номыг ариутган шүүж хэвлэлд бэлтгэхдээ “Энэхүү бичгийн хувь нэмэр нь “Монголын нууц товчоон” болон “Богд баатрын биеэр дайлсан тэмдэглэл”-ээс дутахгүй” хэмээн өндөр үнэлсэн байдаг. Уг ном 1979 онд Өвөр Монголд монгол бичгээр орчуулагдан хэвлэгдсэн бөгөөд Ж.Баясах 2006 онд кирилл бичигт орчуулан Улаанбаатар хотод хэвлүүлжээ. (А.Пунсаг)