Урад гэдэг нь овог ба засаг захиргааны хам шинжтэй нэр болно. Үгийн язгуур нь “уран” бөгөөд Урад гэдэг нь “уран”-ы олон тооны хэлбэр хэмээн үздэг. Энэ нэрийн үүслийн тухай “Юань улсын Тайзцу хааны дүү Хавт Хасарын 14 дүгээр үеийн ач Бурхай Хөлөнбуйрын газарт нутаглан сууж түүний харьяат аймгаа Урад хэмээн нэрлэсэн” гэж сурвалжид тэмдэглэжээ. Бурхай ноёны үед Урад аймгийг гурав хувааж отгон хөвгүүн Барсайн ач Туба, Сэрэн нарт тус тус захируулжээ. Манж Чин улсын Сэцэн хааны 7 дугаар онд (1633) Манжид дагаар орсон байна. Манж Чин улсаас 1648 онд Урад аймгийг гурван хошуу хувааж Тубагаар Урадын хойд хошууг захируулж, Омбын хөвгүүн Өбэнээр Урадын өмнөд хошууг захируулж, Сэрэнгийн хөвгүүн Багваахайгаар Урадын дундад хошууг захируулж бүгдийг засаг ноён өргөмжилж тус тус улсын түшээ гүн, улсад туслагч гүнгийн хэргэм соёрхжээ. Үүнтэй холбогдуулан бас “Урадын гурван гүнгийн хошуу” ч гэдэг. Энэ гурван хошууны нутаг нь их төлөв Бортохойн ар тал, Монь уулын өмнө хэсгийн өргөн уудам нутгаар суурьшиж байжээ. 1949 оноос хойш ӨМӨЗО-ы Баяннуур аймагт харьяалуулан Урадын дундад, өмнөд, хойд гурван хошууг хэвээр үлдээсэн байна. (А.Пунсаг)