Дөргөнэ бол Өгэдэй хааны зургаадугаар хатан бөгөөд Найман аймгийн хүн. Тэрээр уул нь Мэргэд аймгийн ахлагч Тогтога Бэхийн их хөвгүүн Худугийн эхнэр байжээ. 1204 онд Чингис хаан Мэргэд аймгийн үлдэгдлийг байлдан ялж Дөргөнэг олзлон өөрийн хөвгүүн Өгэдэйд хатан болгон шагнажээ. Дөргөнэ төрөлхийн сэцэн сэргэлэн бөгөөд гоо үзэсгэлэн учир Өгэдэй хаанд таалагдан “Наймажин хатан” хэмээн өргөмжлөгдөж Гүюг тэргүүтэй хөвгүүдийг төрүүлсэн байна. 1241 онд Өгэдэй хаан нас нөгчсөнд Дөргөнэ хатан төр мэдэж 1241-1246 он хүртэл Их Монгол улсын хаан ширээг эзэлжээ. Энэ хугацаанд тэрээр Фатима, Абдурахман зэрэг зальхай хүмүүсийг хэрэглэн Монгол төрийн хуучин түшмэд Чингай, Елюй Чуцай, Ялавач зэрэг хүмүүсийг хорлохыг завдсанд эдгээр хүмүүс Өгэдэй хааны хоёрдугаар хөвгүүн Хүдэн ноёны тэнд дутаан очиж амь хэлтэрч байжээ. Дөргөнэ хатан төр барьж байсан хугацаанд хууль цааз самуурч төр засаг цалгайран шударга түшмэд ихээхэн хор амсаж байв. Олон ноёд түшмэдийн шахалтаар 1246 онд өөрийн хөвгүүн Гүюгийг хаан сууринд өргөмжилжээ. Гүюг хаан суусны сүүлээр шударга ёсыг сэргээж, самуурсан засгийг шинэчлэн өөрчилж шударга сайд нарыг дахин засаг төрд хэрэглэжээ. (А.Пунсаг)