Монголчуудын доторх язгууртны ихэнх нь Боржигин овогтой билээ. “Монголын нууц товчоон”-д “Бодончар Боржигин овогтон болов” гэсэн тэмдэглэл байдаг. Зарим мэдээ сэлтийг үндсэлбэл Бодончар бол X зууны үеэр амьдарч байсан монголчуудын дээд өвөг бөгөөд тэргүүлэгч байжээ. Бодончараас гурван үеийн өмнө Боржигдой мэргэн гэсэн нэртэй хүн байсан ч Боржигин овгийг түүнээс эхлээгүй харин тэнгэрийн хөвгүүн хэмээгдэх Бодончараас эхлэн тооцдог. Үүнийг зарим эрдэмтэн монголын Бөртэ чоноос эхэлсэн ноёдын удам Добу мэргэнд хүрээд тасарсантай холбон үзэж Чингис хааны үеэс эхлэн өвөг дээдсээ Бодончартай холбож Боржигин овгийн эхлэл болсон хэмээн үздэг. Өөрөөр хэлбэл Боржигин овог нь Бодончараас эх үүсэлтэй бөгөөд Боржигин овгийнхон XIII-XIV зууны үеийн Монголын эзэнт гүрэн болон XVI зууны 2-р хагасаас XVII зуунд Зүүн Монголын бүхий л эрхийг барьж маш өндөр нэр нөлөөтэй байсан тухай түүхэнд өгүүлдэг. Ер нь XVIII-XX зууны эхэн хүртэл бүх Монголын эрх мэдэл Чингис хааны үр удмын Боржигин тайж нарын гарт байсан юм.

Боржигин гэдэг үгийн язгуур нь “бор, бүри, бөртэ” гэх мэт чоныг заасан үг, “жигин” гэдэг нь “тигин” хэмээх үгийн хувилбар, Боржигины дээдэс чоно онгонтой байсан тул ийнхүү нэрлэв гэж үздэг. Бас зарим бичигт бор буюу цэнхэр бор нүдтэй гэсэн үг хэмээн тайлбарласан байдаг. Боржигин овгийнхон 1000-аад жил монголын гол овог буюу ноёрхох овог байсан ба хүн ам олонтой байсан байна. Одоогийн Монгол улс Өвөр Монголын олон ястны дунд түгээмэл тархаж байна. (А.Пунсаг)