Адил утгатай үг | Еншөөбү түмэн |
Хамаа бүхий үг | Их Юань улс, Дөчин дөрвөн хоёрын Монгол улс |
Төрөл | Засаг захиргааны нэгж |
Цаг үе | Их Юань улс, Дөчин дөрвөн хоёрын Монгол улс |
Хэний хаанчлалын үед | Аюурбарвад |
Салбар, чиглэл | Түүх |
Үндэслэн байгуулагч | Их Юань улс |
Угсаа | Монгол |
Бүс нутаг | Монголын эзэнт гүрэн |
Үүсч байгуулагдсан он цаг | 1315 |
Еншөөбү гэдэг нь Их Юань улсын үед байгуулагдсан засаг захиргааны нэр байв. Өөрөөр хэлбэл Юньшуйфу гэдэг хятад үгний авианы хувирал болно. Түүнийг 1315 онд Буянт хаан Аюурбарвад Цагаан нуурын явуул ордны хүнс хангамж болон бүргэд шонхор тэжээх зориулалтаар анх байгуулжээ. Тухайн үед Шандын голын Дээд нийслэлээс Баочанчжоу-гийн Хүйтэн нуур хүртэлх газар нутгийг хамаарч гуравдугаар дэсийн зэрэгтэй захирагч томилон захируулдаг байжээ. Тухайн үед Еншөөбү дотроо асуд цэргийн хороо, адуу маллагч харчин хороо, чоноч хороо, бүрээчин хороо, шувуучин хороо, дархан хороо, баргуд хороо, хонхотан хороо, нумчин хороо, найман хороо зэрэг засаг захиргааны нэгжээс бүрэлдэж байжээ.
Батмөнх Даян хааны үед баруун гурван түмний нэг нь болж жононгийн эзэмшилд багтаж явжээ. Даян хаан нас барахаасаа өмнө Асуд, Еншөөбү нарыг өөрийн хөвгүүн Увсанз Чин тайжид өмчлүүлэн өгсөн боловч Чин тайжийн үр хойчис удаан өмчилж чадалгүй сүүлд Барсболдын 6-р хөвгүүн Бодидара ноёны эзэмшилд шилжжээ. Еншөөбү тухайн үед Асуд, Харчин, Шарнууд, Буриад, Данлагар, Шувуучин, Барга, Хонхотан, Нумчин, Таван аймаг зэрэг отгуудаас бүрэлдэж байжээ. Еншөөбү түмний нэг хэсэг нь Харчинд шингэж нэг хэсэг нь Түмэдэд уусаж бие даасан овог отог байхаа болив. Харин Ар, Өвөр олон монголчуудын дунд Еншөөбү нь овог болон хувирчээ. (А.Пунсаг)
Юань улсын судар
Очир А., Монголчуудын гарал нэршил, УБ., 2008
Чжан Му, Монголын хошуу нутгийн тэмдэглэл, Хөх хот, 1988
Содномдорж Б., Монгол овог ястны чуулган, Ляонин, 2007
Буянхүү, Монгол түүхийн толь бичиг - Эртний боть, Хөх хот, 2010
Монгол судлалын нэвтэрхий толь - Эртний түүх, Хөх хот, 2010
Тус толийн талаарх санал хүсэлтээ
contact@mongoltoli.mn хаягаар ирүүлнэ үү.
© Монголын түүх 2016 он