Зуу Удын чуулганд Найман хошуу, Баарин хоёр хошуу, Жарууд хоёр хошуу, Хишигтэн хошуу, Оннигуд хоёр хошуу, Ар Хорчин хошуу, Халх зүүнгарын хошуу зэрэг 11 хошуу харьяалагдаж байжээ. Тухайн үед Оннигудын зүүн гарын хошууны Зуу Уд гэдэг газар чуулган чуулдаг тул Зуу Удын чуулган гэж нэрлэжээ. Одоогийн ӨМӨЗО-ы Улаан хад хотын нутаг дэвсгэрийг бүрэн хамарч байжээ. Эдгээр хошууг захирсан засаг ноёд бүгд Чингис хааны дүү нар, үр хойчис, удам угсааныхан болно. Батмөнх Даян хааны ач Боди Алаг хааны дүү Алима ноёны хөвгүүн Буйма, түүний ахмад хөвгүүн Дайчиндүүрэн Аоханы ноёд болов. Хоёрдугаар хөвгүүн Эсэн үйзэн Найман хошууны ноён болов. Батмөнх Даян хааны тавдугаар хөвгүүн Алчуболд Жарууд, Баарин хоёр хошууны ноён болов. Батмөнх Даян хааны зургаадугаар хөвгүүн Очирболд Хишигтэний ноён болов. Хавт Хасарын үр хойчсын нэгэн салаа нь Ар Хорчины дээдэс болов. Отчигин ноёны үр хойчис нь Оннигуд 2 хошууны дээдэс болжээ. Халхын Засагт хан аймгийн Шолой убаши хунтайжийн гуравдугаар хөвгүүн Гомбо-Илдэн ноён дотоодын үймээнээс зайлж Энх амгалан хааны гуравдугаар онд (1664) Өвөр Монголд ирж Манжийг дагасанд Халхын зүүн гарын хошуу хэмээн нэрлэж засаг өргөмжлөн Зуу Удын чуулганд харьяалуулжээ. (А.Пунсаг)