Жалайд бол Жалайр аймгийн өөр нэрийдэл болно. Түүхэн мэдээг үндсэлбэл Чингис хааны дүү Хавт Хасарын 16 дугаар үеийн Амин Дархан Бага ноёны үед өөрийн харьяат аймгаа Жалайд хэмээн нэрлэсэн байна. Манж Чин улсын үед Жиримийн чуулганы 10 хошууны нэг нь болж бэйс өргөмжлөгдөж Чин улсын захиргаанд оржээ. Тухайлбал: Тэнгэрийн бошигтын 9 дүгээр онд (1624) Амины хөвгүүн Хорчины тайж Уубагийн хамт Манжийг дагасанд Дархан хошууч цол олгожээ. Тэрээр Сэцэн хааны 8 дугаар онд (1634) нас нөгчсөнд Эеэр засагчийн 5-р онд (1648) гавьяа зүтгэлийг нь үнэлж хошууны бэйс нэхэн өргөмжилж хөвгүүн Сэрэнд нь бэйсийн зэргийг уламжилж хошуу засаг болгов. Сэрэнгийн үе удам Манж Чин улс мөхтөл бэйсийн зэргийг залгамжилсаар байжээ. Жалайд хошуу Манжийн үед 16 сумтай болсон байна. 1949 онд БНХАУ байгуулагдсаны дараагаар ӨМӨЗО-ы Жирим аймгийн нэгэн хошуу болжээ. (А.Пунсаг)