Өлзийтөмөр хаан буюу Буняшир бол Элбэг Нигүүлсэгч хааны хүү бөгөөд багадаа дотоодын самуунаас зайлж Дундад Ази дахь Төмөрийн эзэнт гүрэнд хэсэг зуур сууж байв. 1408 онд Гүйличи хаан нас барсанд Аругтай тайш Буняширийг Бэшбалык хотоос авчирч их хаан болгожээ.

1409 онд Буняширийг ойрадууд довтолсонд тэрээр ялагдаад, Аругтайтай хамт Хэрлэн голын орчим нутаглах болжээ. Тэр үед Мин улсын элчийг хороосон тул Юнлэ хаан Буняширийг довтлов. Тиймээс Буняшир нар Мин улсын 10 түмэн цэргийг угтан тулалдаж бутцохьжээ. Гэвч 1410 онд Мин улсын Юнлэ хааны удирдсан 50 түмэн цэрэг, Ойрадын цэргийн хамтаар Онон мөрөн хүртэл довтлон ирсэнд Буняшир, Аругтай нар хүчин мөхөсджээ. Аль тийш зугтах талаар Буняшир, Аругтай нар санал зөрөлдөн салжээ. Буняшир Онон мөрний орчим Мин улсын цэрэгтэй тулалдсан боловч ялагдаад цөөн хүний хамт зугтан гарч Ойрадад очжээ. Улмаар Буняшир хааныг Бэшбалык руу явах замд нь 1412 онд Батула чинсан хорлож алаад, Юан улсын хааны тамгыг булаан авч Хархорум хотыг эзэлжээ. (Ц.Цэрэндорж)