Ууба нь Чингис хааны дүү Хасарын 18-р үеийн ач. 1590-ээд оны үед Цзяньчжоу-гийн зүрчидийн толгойлогч Нүрхачи хүчирхэгжсэнд зүрчидийн бусад аймгийн ноёд түүнийг эсрэг холбоо байгуулан тэмцжээ. 1593 онд Хорчин аймгийн тэргүүн Унгудай, Мангус, Мянган нар тэдгээр зүрчидийн ноёдтой хамтран Нүрхачийн эсрэг байлдсан боловч ялагджээ. Энэ тулалдаанд Унгудайн ахмад хөвгүүн Ууба ч бас оролцсон ажээ. Хожим нь Ууба эцгийгээ залгамжлан Хорчин аймгийн тэргүүн болжээ. Монголын их хаан Лигдэн болон Өвөр Халхтай таарамжгүй харилцаатай байсан Ууба 1624 онд Хожуу Алтан улс (Нүрхачи байгуулсан улсыг анхандаа ингэж нэрлэдэг байв)-тай харилцан туслалцах гэрээ байгуулав. 1625 онд Лигдэн хаан Хорчиныг довтлоход Хожуу Алтан улс Уубад цэргийн дэмжлэг үзүүлжээ. Түүний дараа жил Ууба өөрийн аймгийг авч Хожуу Алтан улсад дагаар оров. Нүрхачи өөрийн дүү Шүрхачийн ач охиныг Уубад эхнэр болгон өгч, “Түшээт хан” цол шагнажээ. Ууба 1628 онд Хожуу Алтан улсад туслан Мин улсын хил хязгаарыг уулгалан довтлов. Ууба 1631 онд нас баржээ. Манж нар 1636 онд түүний хүү Бадари-д засаг, Түшээт чин вангийн хэргэм олгож, Хорчины баруун гарын дундад хошууг захируулжээ. Тус хошууг Түшээт вангийн хошуу гэх бөгөөд Уубагийн үр хойчис үе улиран захирч иржээ. (Ц.Цэрэндорж)