Засгийн хэргийг тэгшлэн шийтгэгч түшмэл (平章政事) нь Төв бичгийн мужийн баруун, зүүн этгээдийн чэнсян (丞相)-гийн дараагийн албан тушаал. Нанхиад дуудлага нь “пинчжан чжэнши” бөгөөд бас “пинчжан” хэмээн дөхөмчлөн нэрлэдэг. Тэдний тоо 2-6-гийн хооронд хэлбэлзэж байгаад, 1330 оноос эхлэн уг тушаалд 4 хүн ажиллах болжээ. Засгийн хэргийг тэгшлэн шийтгэгч түшмэл нь дэс нэгдүгээр зэрэгтэй бөгөөд чэнсян нарт туслан төр, цэргийн хүнд чухал хэргийг шийддэг байжээ. Салбар төв бичгийн мужид бас ийм албан тушаалтан хоёрыг томилдог байсан агаад салбар мужид чэнсянг байнга томилдоггүй байсан учир засгийн хэргийг тэгшлэн шийтгэгч түшмэл нь үнэн хэрэгтээ салбар мужийн тэргүүний үүргийг гүйцэтгэдэг байжээ. (Ц.Цэрэндорж)