Энэхүү Хүннүгийн оршуулгын дурсгалт газар Ховд аймгийн Манхан сумын төвөөс баруун өмнө зүгт 20 км орчим зайд, Цэнхэрийн голын хөндийд орших өндөр уулын арын тэгш дэвсэгт байрлана. Булшнууд нь үүдэвчтэй дөрвөлжин хэлбэрийн гадаад чулуун байгууламжтай том, цагариг хэлбэрийн дунд болон жижиг булшнууд юм. Нийт 130 орчим булш бүртгэжээ.

Дурсгалт газрыг 1960 онд Манхан сумын төвд эвдэгдсэн булшинд авран хамгаалах малтлага хийхээр ШУА-ийн Түүхийн хүрээлэнгээс томилогдон очсон В.В.Волков, Ц.Доржсүрэн нар анх илрүүлж, тэр жилдээ оршуулгын газрын хойд захад байрлах том булшны дагуул 2 жижиг булшийг малтан шинжилжээ. Хожим 1987-1990 оны хооронд мөн хүрээлэнгээс томилон ажиллуулсан “Ховдын шинжилгээний анги” үүдэвчтэй дөрвөлжин хэлбэрийн 2 том, хэдэн цагариг хэлбэрийн дундаж болон жижиг булш малтсан байна. Анхны малтлагыг хийсэн судлаачид дурсгалыг “Хаалгатын завсар” хэмээн нэрлэсэн боловч Ховдын шинжилгээний анги “Тахилтын хотгор” нэрээр нийтлэжээ. Дурсгалт газар нь удаахь нэрээр илүү танигдсан байна. Түүнээс гадна шинжилгээний ангийн археологич Д.Наваан 1988 онд малтсан булшнаас гарсан хүний яс эмэгтэй хүнийх байсанд тулгуурлан уг булшийг “Гүнжийн булш” хэмээн нэрлэсэн нь олон нийтийн дунд алдаршсан байдаг.

Монголын Үндэсний музей, АНУ-ын Пенсильваний Их сургуулийн хамтарсан шинжилгээний анги 2007 онд судалгаа хийж 1 жижгэвтэр язгууртны булш болон дагуул булш, тахилгын байгууламж зэргийг малтан шинжилжээ.

Тахилтын хотгорын булшнууд нь бүтэц зохион байгуулалтын хувьд Монголын төв болон зүүн бүс нутагт малтлага хийсэн Ноён уул, Гол мод, Дуурлиг нарс зэрэг Хүннүгийн язгууртны булшнуудтай төстэй боловч хэмжээний хувьд харьцангуй жижиг юм. Тахилтын хотгорын булшнууд нь хамгийн баруун захаас илэрсэн Хүннүгийн язгууртан дээд давхаргынханд холбогдох дурсгал тул Хүннү гүрний баруун жигүүрийнхэнтэй холбоотой байх магадлал өндөр гэж үздэг.  (Г.Эрэгзэн)