Өлзийхутаг нь Корйөгийн Хэнжү (幸州, 행주) нутгаас гаралтай, Корйө улсаас Юань улсад албанд өргөсөн эмэгтэйчүүдийн нэг бөлгөө. Эцэг нь Ки Ча-о (奇子敖, 기자오), ах нь Корйөгийн эцэс үеийн эрхт түшмэл Ки Чхөл (奇轍, 기철) болой.

Өлзийхутаг 1333 онд Юань улсын ордны санхүүг эрхэлдэг Вэйчжэнюань (微政院)-д алба хашиж байсан корйө гаралтай тайган Ко Ёнбо (高龍普, 고용보. Монгол нэр нь Түмэндар (禿滿迭兒))-гийн санал болгосноор хааны ордонд анх орж, улмаар Тогоонтөмөр хааны сэтгэлийг татжээ. 1335 онд Тогоонтөмөрийн их хатан Танашири (答納失里)-ийн гэр бүлийнхэн зайлуулагдсанаар Өлзийхутагийг их хатан болгох хөдөлгөөн өрнөсөн боловч, Баян нар эсэргүүцсэн учир биеллээ олсонгүй.

Өлзийхутаг 1337 онд 2-р хатнаар өргөмжлөгдөж, 1339 онд Аюушридараг төрүүлжээ. Ийнхүү хатан болсны дараа эсэргүүцэл хүчнийг хөөн зайлуулж, Вэйчжэнюань-ы нэрийг Цзычжэнюань (資政院) хэмээн халж, энэхүү байгууллагад тулгуурлан асар их хүч нөлөөтэй болжээ. Өлзийхутаг Тогоонтөмөрийг хаан сууж байх хугацаанд түүнийг хаан ширээгээ хөвгүүн Аюушридарад шууд найр тавин өгүүлэхийн тулд халз тулах оролдлого хийснээр Дай Юань улсын төрийг сулруулахад багагүй нөлөө үзүүлжээ.

Ийнхүү Өлзийхутаг хатан Юань улсад нөлөө ихтэй болсныг ашиглан Корйө улсад түүний гэр бүлийнхэн өөрсдийн байр суурийг бэхжүүлжээ. Улмаар тэрээр Баянхутаг хатныг нас барсны дараа 1365 онд их хатан монгол хүн байх ёстой гэсэн тогтсон зарчмыг эвдэж, их хатан болжээ. 1368 онд Тогоонтөмөртэй хамт монгол нутаг руу одсоноос хойш түүний талаар мэдээ үгүй. Эдүгээ БНСУ-ын Кйөнги мужийн Йөнъчхөнъ ыб-д Ки овогт Өлзийхутаг хатны булш хэмээн домоглодог булш байдаг. (Ц.Цэрэндорж)