Цэргийн даргалах бүрэлдэхүүнийг бэлтгэх зорилгоор 1921 оны 8 дугаар сарын 20-нд хорин сурагчийг бүртгэж, улмаар 10 дугаар сарын 15-нд  90 хүнтэйгээр морин цэрэг, улс төрийн гэсэн хоёр ангитай, зургаан сарын хугацаатай сургалтаа эхлүүлжээ. Анхны захирлаар нь П.М.Толпыгин, комиссараар нь Н.Юмжав нар томилогджээ. Даргын сургуулийн анхны төгсөлт 1921 оны 12 дугаар сарын 25-нд болж, салаан дарга 15, хагас салаан дарга зургааг төгсгөжээ.

Даргын сургуульд 1922 оноос их бууны салаа нэмэн байгуулж, суралцах хугацааг нэг жил болгосон бол 1923 онд Ардын засгийн газар “Даргын сургуулийг шинэчлэн байгуулах тухай дүрэм” баталж, сургуулийн морин анги, их бууны анги, пулемётын ангийн суралцах хугацааг гурван жил болгон суман, салаан дарга нарыг бэлтгэх, мөн морин цэрэг, их бууны дарга нарыг давтан сургах 10 сарын хугацаатай курс байгуулах, суртлын сургагч, холбоочдыг нэг жил, захиргаа, аж ахуйн ажилтнуудыг найман сарын хугацаатай бэлтгэх тогтолцоотой болгосон байна.

Даргын сургуулийн бүтэц зохион байгуулалт, үүрэг зориулалт, сургалтын агуулга, чанар улам бүр өргөжин гүнзгийрсээр 1923-1924 оны хичээлийн жилээс “Бүх цэргийн ерөнхий сургууль”, 1932 оноос “Цэргийн ерөнхий сургууль” болон өөрчлөгдөв. Тус сургууль 1966 оноос Цэргийн ерөнхий дээд сургууль, 1981 оноос Цэргийн нэгдсэн дээд сургууль, 1991 оноос Цэргийн их сургууль, 1999 оноос Батлан хамгаалахын их сургууль болжээ. 

Ардын цэргийн даргын сургууль нь МАХЦ-ийг үндэсний боловсон хүчнээр хангах, улс орны батлан хамгаалах хүчийг бэхжүүлэхэд төдийгүй улс ардын аж ахуйг зохих боловсрол мэдлэгтэй, удирдах чадвартай шинэ залуу боловсон хүчнээр хангахад үнэтэй хувь нэмэр оруулжээ. Ийм учраас төр засгийн шийдвэрээр тус сургуулийг 1947 онд жанжин Д.Сүхбаатарын нэрэмжит болгож, 1932 онд Байлдааны гавьяаны улаан тугийн одон, 1971 онд Сүхбаатарын одонгоор шагнажээ. (Г.Мягмарсамбуу)