Манж Чин улс 1696 оны Зуун модны тулалдааны дараа хэдэн арван мянган цэргийг хэд хэдэн чиглэлээр Ар Монголд байрлуулав. 1715 онд Чин улсын тариалангийн дотоод мужуудаас алслаж Монголд байрласан цэргийг хэрхэн хүнсээр хангах вэ гэдэг тулгамдсан асуудлыг хэлэлцжээ. Тэр үед Түшээт хан Ванжилдорж Орхон, Туулын ойр тойрон Ахуй, Сүхт, Хар ус, Мингай, Цагаан гэр, Хүргих, Завхан гол, Цагаан сүүл, Булган Амсар, Улаангом болон Эрдэнэ зуугийн зэрэг газарт тариа тарьж болох учрыг мэдэгдсэн учир Халх Монголд Манж Чин улсын цэргийн тариалан анх бий болжээ. Халх Монголчуудаас зүтгэх хүчний мал гаргуулж, тэднээр өөрсдөөр нь тариа тариулах явдал нь Чин улсад маш ашигтай байсан учир цэргийн тариалангууд дараалан байгуулагдав. Тухайлбал 1716 онд Хөх хотын Түмэд Монголчуудаас тариалангийн дадлага туршлагатай 1000 хүнийг Улаангомд ирүүлж тариа тариулав. Мөн 1720-1723 онд Улаангом, Цагаан сүүл, Өлзийт голд тариа тарих цэрэгт Халх монголчуудаас 674 морь, 416 үхэр гаргуулж, 1727 онд хураасан ургацыг тээвэрлүүлхээр халхын гурван аймгаас 1500 тэмээ гаргуулж байжээ.    Зүүнгар Чин улсын өрсөлдөөн манж Чин улсын ялалтаар дууссаны дараа 1762 онд цэргийн ангуудад зориулсан тариаланг буулгаж, зөвхөн Ховд дахь цэргийн тариаланг хэвээр байлгажээ. Ийнхүү Ховд дахь тариалангийн газрыг Ар Монгол дахь манжийн цэргийн амуу будааг хангах гол газар болгож, манж, монгол цэргүүдээр тариулах ажлыг хэвээр үргэлжлүүлжээ. 1762 онд Түшээт хан аймгаас 200, Засагт хан аймгаас 72, Сайн ноён аймгаас 128 өрх, бүгд 400 өрхийг Ховдод нүүлгэн очуулж тариа тарих албыг хаалгаж байжээ. Тариалангийн газар жил бүр өөр байх учир 200-400 өрхийг тариа тариулж, хэдэн зуу, хэдэн мянган километр алс замд өндөр уул, өргөн мөрнийг гэтэлж Ховдод хүрээд тариа тарьж ургуулах, ургац алдалгүй авах, албан хэрэгцээт газарт нийлүүлэн өгөх зэрэг хэрэгт хүн малын хүч ихээр шаардах учир 120 хүнийг мөн туслуулдаг байв. (Г.Одбаяр)