Батмөнх Даян хааны хүү Гэрсэнзийн 7 хүү Ар Халхыг хуваан авахад 3-р хүү Онохуй Үйзэн ноён (1534-?) горлос, хэрэгүд (гэрүүд) отгийг өвлөн авчээ. 1610-аад оны сүүлчээр Түвэдэд шар малгайтан ба улаан малгайтны шашин зөрчилдөн тэмцэлдэхэд Онохуйн 4-р хөвгүүн Түмэнхэн (1558-1640) цэрэг авч Түвэдэд ороод, шарын шашныг хамгаалахад хүчин зүтгэсэн тул Далай ламаас “Сайн ноён” цол хүртсэнээр Халхын гурван хантай адил хүндлэгдэх болжээ. Халхын Зая бандидын намтарт өгүүлснээр, Түиэнхэн шашин, төрийн хэрэгт ихэд хичээн зүтгэж, Халхын ноёдоос хамгийн түрүүнд Түвэд оронд одож Банчин эрдэнэ, Дэмо хувилгаан зэрэг шашны дээдэс лам нарт өглөг ихийг өргөсөн, IV Далай лам Ёндонжамцын суваргыг бүтээхэд 10 мянган лан мөнгө өргөн барьсан гэх зэрэг гавьяатай учир Банчин богд түүнд “Ашока номын хаан Хүндлэн цөхүр” гэсэн бичээс бүхий мөнгөн тамга шагнасан ажээ.

Түмэнхэн ийнхүү шарын шашныг дэмжин тэтгэх, Халхад шашин дэлгэрүүлэхэд гавьяа байгуулсан тул хожим нь Түмэнхэнийг Халхын Зая бандид Лувсанпринлэйн өмнөх дүрээр нэхэн тодруулжээ.

Түмэнхэн Халхын 3 ханаас дутуугүй нэр нөлөөтэй байсан нь хожим Сайн ноён аймгийг Түшээт хан аймгаас таслан байгуулах үндэс суурь болжээ.

Түмэнхэн 1640 онд нас барсанд 2-р хөвгүүн Данзан лам нь залгамжилжээ. Данзан ламын дараа түүний хөвгүүн Тасхив, ач Шамба, жич Дашдондов нар удаа дараалан залгамжилсан хэдий ч тэдний хэн нь ч “Сайн ноён” гэдэг цолтой байгаагүй ажээ.

1725 онд Түшээт хан аймгаас Түмэнхэний угсааныхны захирсан 19 хошууг салгаж шинэ аймаг байгуулаад, түүний “Сайн ноён” цолоор нэрлэжээ. 1766 онд Дашдондовын ач Норовжавт “Сайн ноён” цол, тамга олгосноос хойш түүний угсааныхан тус цолыг үе улиран залгамжилжээ. 1911 онд Сайн ноён Намнансүрэнд Богд хааны зарлигаар “хан” цол олгосноор, 1912 оноос эхлэн Сайн ноён хан гэгдэх болжээ. (Ц.Цэрэндорж)