Шидбал бол Аюурбарвад Буянт хааны хүү бөгөөд эцэг нь өөрийн ах Хайсандаа түүний хөвгүүнийг хуантайцзи болгоно хэмээн амлажээ. Гэвч Хайсан нас бармагц амлалтаа зөрчиж, түүний 2 хөвгүүнийг хязгаар нутагт нутаг заан суулгаад, өөрийн хүү Шидбалыг 1316 онд хуантайцзи өргөмжилжээ. 1320 онд Аюурбарвада хаан нас барсны дараа түүний эх Даги хатан Шидбалыг хаан сууринд суулгажээ. Даги түүнийг тоглоомын хаан болгож, бодит эрх мэдлийг атгах болов.

1322 онд Даги, 1323 онд түүний шадар түшмэл Тэмүдэр нар нас барснаар Шидбал жинхэнэ ёсоор төрийн эрхийг барих гэж оролджээ. Тэрээр Жалайр овгийн Байжу гэдэг түшмэлийг Тэмүдэрийн оронд томилжээ. Тэгээд Дагигийн талын хүмүүсийг цээрлүүлж, зайлуулахыг оролдов. Түүний хариуд Дагигийн талын хүмүүс юйшидафу түшмэл Тэгшийг тойрон нэгджээ. 1323 оны 8-р сард Шидбал, Байжу нарыг Тэгш нар Шандугаас Дайду руу буцах замдаа Наньподянь гэдэг өртөөн дээр хороов. Үүнийг “Наньпо-гийн хувирал” хэмээдэг.

Шидбал хааны үед Хубилай хаанаас наашхи хууль дүрмийг цуглуулан эмхэтгэсэн “Их Юань улсын нэвтэрхий дүрэм (Да Юань тунчжи)” гэдэг хууль цаазын эмхэтгэлийг зохиожээ. (Ц.Цэрэндорж)