М. Энхболд элит орчинд өсөж торнин, МУИС-ийг 1987 онд  эдийн засагч мэргэжлээр төгссөн. Монгол оронд өөрчлөлт шинэчлэл ид өрнөсөн жилүүдэд төр захиргаа, аж ахуйн удирдах алба хашиж эхэлсэн Монгол сэхээтний нэрд гарсан төлөөлөгч юм.  М.Энхболд  нийслэл хотноо төр, захиргаа, аж ахуйн анхан шатнаас эхлэн дээд шатанд нь хүртэл орь залуугаасаа дэвшин алба хашиж, улсын доторх “улс” болох Улаанбаатарыг арван хуруу шигээ мэдэх болсон удирдах зүтгэлтэн билээ. Тэр бээр ХХ зууны сүүлчээс улс төрийн амьдралд идэвхтэй оролцож, Нийслэлийн МАХН-ын хорооны даргаас МАН-ын тэргүүн болтол өсөн дэвшиж ажилласан улс төрийн туршлагатай зүтгэлтэн юм.

    2016 оны УИХ-ын сонгууль болон аймаг нийслэл, сум дүүргийн Иргэдийн төлөөлөгчдийн сонгуульд МАН-ыг “Бид хамтдаа” гэсэн уриан дор бэлтгэн оруулж, эх баригч нам болтол дэвшүүлсэн гол гавъяа түүнд оногдоно. М.Энхболд Улсын Их Хурлын гишүүнээр удаа дараа сонгогдож, Монгол Улсын Ерөнхий  сайд, шадар сайд, УИХ-ын дэд даргын албыг удаа дараа хашиж ирсэн монгол төрийн өсөж дэвшиж яваа, идэр залуу зүтгэлтэн болой. Эдүгээ улс орныг эдийн засгийн хүндрэлээс гаргах амаргүй зорилтыг шийдвэрлэхийн төлөө хүчин зүтгэж байна.

            Төр, засгаас түүний хөдөлмөр зүтгэлийг үнэлж, 1999 онд Алтан гадас одон, 2005 онд Хөдөлмөрийн гавъяаны улаан тугийн одон, 2006 онд Их Монгол Улс байгуулагдсаны 800 жилийн ойн хүндэт медалиар шагнажээ. 2005 онд Монгол Улсын Нийслэлийн хүндэт иргэнээр өргөмжлөгджээ. (Ж.Болдбаатар)