Үндсэн мэдээлэл:

Адил утгатай үг Барууны чиг баримжаатай нам
Хамаа бүхий үг Ардчилсан холбоо, ардчилсан өөрчлөлт
Төрөл Үйл явдал
Цаг үе 1990 оны 2 дугаар сарын 18
Бүс нутаг Монгол
Байгуулагдсан цаг хугацаа 1990 оны 2 дугаар сарын 18
Анх хаана байгуулагдсан Улаанбаатар хот
Холбогдох түүхэн хүн С.Зориг, Ц.Элбэгдорж, Э.Бат-Үүл зэрэг

Ардчилсан нам

Ардчилсан хувьсгалыг удирдсан барууны чиг баримтлалттай улс төрийн нам

    1989 оны 11 дүгээр сарын сүүлчээр Улаанбаатар хотод болсон залуу уран бүтээлчдийн улсын хоёрдугаар зөвлөгөөнд оролцсон уран бүтээлч залуу сэхээтнүүд тухайн үед нийгэмд хуримтлагдсан бэрхшээл, зөрчлийг илэн далангүй илчилж, эрх баригчдын алгуур, идэвхгүй үйл ажиллагааг хурцаар шүүмжилсэн. Тус зөвлөлгөөнд оролцсон хэсэг залуучууд өөрчлөлт, шинэчлэлийг түргэтгэхэд тус дөхөм үзүүлэх зорилготой улс төрийн байгууллага үүсгэн тэрлэх болсноо мэдэгдэж, Монголын ардчилсан холбоог байгуулав. Ардчилсан холбоо 1990 оны 2 дугаар сарын 18-нд анхдугаар их хурлаа хийж, Монголын Ардчилсан Нам /МоАН/ байгуулах шийдвэр гаргав. 1990 оны 4 дүгээр сарын 8-9 нд МоАН-ын их хурал болж, намынхаа дүрмийг баталж, намын Ерөнхий зохицуулагчаар Э.Бат-Үүлийг сонгон баталж, 1990 оны 5 дугаар сард БНМАУ-ын Дээд шүүхэд хууль ёсоор бүртгүүлсэн. Ийнхүү МоАн байгуулагдсан нь ардчиллыг жинхэнэ ёсоор хэрэгжүүлэх олон намын тогтолцооны эх суурийг бүрдүүлж, Монгол Улсын хөгжлийн шинэ сонголтын эхлэлийг тавьсан түүхэн ач холбогдол бүхий үйл явдал болов.

    2000 онд Монголын Ардчилсан Нам, Монголын Үндэсний Ардчилсан Нам, Монголын Социал Демократ Нам, Монголын Сэргэн Мандлын Нам, Монголын Шашинтны Ардчилсан Нам нэгдэж “Ардчилсан нам” болсон. Тус нам 1992-1996 онд “Ардчилсан холбоо эвсэл” байгуулан ажиллаж, 1996-2000, 2012-2016 онд УИХ-д олонхи болон засгийн эрх барьж байв. (Ж.Болдбаатар)

Ашигласан ном зохиол

1990 оны ардчилсан хөдөлгөөний түүхэнд холбогдох баримт бичгүүд. (Эмхтгэсэн Ж.Заанхүү). УБ., 2004.
Монгол Улсын түүх (Түүх, онол-арга зүйн асуудал). УБ., 2010.
Амарсанаа С. Ардчилсан хувьсгалын тэргүүн эгнээнд. ”МН технологи”. УБ.,2011

Дэлгэрүүлж үзэх ном зохиол

Ардчилал 20 жил. Түүх судлалын асуудлууд. УБ., 2010.
Дэлгэртуяа Б.Үүл бид хоёр. УБ., 2012.