1248 онд Гүюг хааныг нас барахад, Өгэдэйн угсаатай таарамжгүй байсан Бат, Тулуйн хүү Мөнхийг хаан болгохын төлөө зүтгэж зорьсондоо хүрсэн юм. 1251 онд Мөнхийг хаан өргөмжлөх Их хуралдай Хэрлэнгийн Хөдөө аралд цэргийн хамгаалалт дор  түгшүүртэй байдалд болжээ. 

Мөнх хаан суугаад засаг захиргааны зарим арга хэмжээг авчээ. Өртөө улааны асуудлыг цэгцэлж зөвхөн төр, албаны хэргээр зорчигчдыг журмын дагуу явуулж, хувийн хэргээр зорчих лам нар, худалдаачдыг журамлаж, өөрийнх нь зардлаар явуулах болгов. Хүн амын тооллогыг дахин хийж алба татварыг цэгцлэв. Малчдын 100 мал тутмаас жил бүр нэг толгой мал, зуу хүрэхгүй бол албанаас хэлтрүүлэх, мөн Хятад, Мавераннахр нутагт жил бүр баян хүнээс 10 алтан зоос, ядуугаас 1 алтан зоос, Хорасанд баян хүнээс 7, ядуугаас 1 алтан зоос хураахаар ялгавартай тогтоож өгснөөр байдал нэлээд дээрджээ. 

Мөнх хаан ордондоо христ, ислам, будда зэрэг шашны төлөөлөгчдийг урьж мэтгэлцүүлж байсан нь дэлхийд анхны тохиолдол байжээ. Тэрбээр гадаад бодлогын хувьд өмнөх хаадын үйл ажиллагааг үргэлжлүүлэн хоёр зүгт байлдан дагуулал хийжээ.

Мөнх өөрийн дүү Хубилайдаа Корё болон Өмнөд Сүн улсыг байлдахыг даалгав. 1256 онд дүү Хүлэгүд цэрэг өгч исламын шашинт улсуудыг эзлүүлэхээр явуулсны дүнд Перс, Ирак, Азербайджан, Армен, Туркестан, Гүржийн нутаг дэвсгэрт Ил хант улсыг байгуулжээ. Улмаар Хүлэгүгийн цэрэг Египетийн цэрэгтэй байлдсан боловч ялагджээ.  

Хятадын Сүн улс, Франц улсын В.Рубрук, Армений II Хетум, Ил хаант улсаас А.М.Жувейни нарын зэрэг элч төлөөлөгчид Хархорумыг зорин ирж Мөнх хаанд  бараалхаж харилцаа холбоо тогтоохыг эрмэлзсэн байдаг.

1257 онд Мөнх хаан өөрийн биеэр цэрэг удирдаж Сүн улсыг дайлахаар мордохдоо төрийн хэргийг дүү Аригбөхдөө түр хамааруулан үлдээжээ. Мөнх хаан Өмнөд Хятадын 20 гаруй хот цайзыг эзлэн амжилттай байлдаж явсан боловч өвчнөөр таалал төгсчээ.

Мөнх хааны гэрэлт хөшөө Хөвсгөл аймгийн Арбулаг, Бүрэнтогтох сумын зааг,  Дэлгэр мөрний зүүн хойд хөвөөн дэх Мөнх хааны ордны тууриас олдсон нь одоо Үндэсний түүхийн музейд хадгалагдаж байна. (Ц.Цолмон)