Сэцэн хан аймгийн Дайчин бэйсийн хошууны нутгийн төв Хүрдэтийн дунд бүрдийн зүүн этгээд Өлзийт Чандмань уулын өвөрт оршино. Анх Манжийн гучин дөрөвдүгээр (1695) он Засаг Туулайн үед тамга шагнагдаж хошуу сум зохиосноос нааш хошууны гол хийд байгуулсан амой. Ойролцоо нэлээд олон хурлууд байсан боловч тэдний хөрөнгө мал хомс тул гол хийдийн газар нийлүүлсэн болно. Бэйл Дашцэрэнгийн үед Бадаргуулт төрийн хорин долдугаар онд Дүйнхор хурал, 1902 онд Жүд дацан, Хэвт ёсны тэргүүн (1911) онд цам бүжиглэх сургууль зэргийг байгуулж улмаар 1916 онд Бадам-Ёго дацан, наймдугаар онд (1918) онд Зурхай дацанг байгуулж өргөжүүлжээ. Харин уг хийдэд хэчнээн лам шавилан сууж асныг мэдэх бололцоо үгүй.