Төгстөмөр нь 1378 онд Аюушридара-г залгамжлан хаан сууж, “Тяньюань” гэдэг оны цолыг хэрэглэх болээ. Тэрээр ахынхаа бодлогыг үргэлжлүүлэн Хархорум, Инчан хавьд үлэмжхэн цэргийн хүч хуралдуулж, Мин улсын хил хязгаарыг уулгалж байжээ. 1380 онд Мин улсын цэрэг Монголд довтлон Хархорумыг эзлэн авчээ. Гэвч Төгстөмөр орд өргөөгөө дорно зүгт Буйр нуурын орчимд шилжүүлэн, сарнисан цэргийн хүчээ дахин эмхлэн хуралдуулж эхэлжээ. Нөгөөтэйгүүр, Ляодунгийн Нагачу ноёнтой холбоолохын зэрэгцээ Солонгосын Корйө улстай холбоо тогтоож, хамтын хүчээр Мин улсын эсрэг тэмцэхийг оролдож байв. 

1388 онд Төгстөмөр Буйр нуурын ойролцоо Мин улсын жанжин Лань Люй-гийн удирдсан цэрэгтэй тулалдаж, ялагджээ. Төгстөмөрийн хоёр дахь хөвгүүн Дибаону, ноёд түшмэд 3000 хүн, 70 мянга гаруй хүн ард, 100 мянган толгой мал Мин улсын цэрэгт олзлогджээ. Төгстөмөр хаан их хүү Тяньбаону, шадар түшмэд чжиюань Нэцэлай, чэнсян Ширмэн нарын хамт цөөн тооны цэрэгтэй зугтан гарч Хархорумын зүг одох замд нь Туул голын орчимд түүний түшмэл Есүдэр гэгч довтлон цохьжээ. Төгстөмөр тэндээс зугтан гарч Хөхтөмөртэй нэгдэхийг завдсан боловч их цас орж замд гарч чадалгүй саатжээ. Энэ үед Есүдэрийн цэрэг Төгстөмөрийг гүйцэж очоод түүнийг хөвгүүний нь хамт хороожээ. Мин улсын цэрэгт олзлогдсон хөвгүүн Дибаону-г нь Рюкю (одоогийн Японы Окинава арал)-д цөлсөн ажээ. (Ц.Цэрэндорж)