Сэцэн хан аймгийн Эрхэмсэг бэйсийн хошууны Өлзий Мөрөн хэмээх газар оршино. Анх Бадаргуулт төрийн анхдугаар он (1875)-д засаг гүн Эрдэнэ Өлзий мөрөн хэмээх газар тавин нэгэн өрөөний сүм байгуулж түүнд Манжийн хаанаас “Ерөөлийг илтгэгч” сүм хэмээх нэр шагнажээ. Богд хаант Монгол улсын үед 1915 онд цагийн самуун тохиолдон муу хулгай дээрэмчид Ганжуур, Данжуур номын хамт эвдлэн шатаажээ. Харин 1916-1918 онд дахин засаж сэлбэх ажил хийсэн боловч хөрөнгө зэрэг зүйлээс хамааран төдий л бүтэмжтэй биш болжээ. Тиймээс засаг Мишигдоржийн үед Өлзий Мөрөн хэмээх газар монгол гэр барьж хурал номын сургууль үйлдэн буй гэж 1919 онд Дотоод хэргийг захирах яаманд мэдэгджээ. Эрхэмсэг бэйсийн энэ хүрээнд Эрдэнэ мэргэн бандида ачит Егүзэр дархан хутагт Галсандамбанямын 3 үеийн хувилгаан сууж байжээ. Сүүлчийн хувилгаан хийд Галсандамбанямын шашин номын үйл хэрэгт үнэлэмж өгч Дархан цорж ачит номун хан хутагт цол олгуулжээ. Дараа Очир дарь Богд гэгээнтнээс хамбын ямба Мэргэн бандида цол шагнан хүртээжээ. 9-р онд улсын санд мөнгө хариулан өргөсөн учир айлтгаад Бишрэлт цол шагнан хүртээжээ. Энэ сүмийг 1938 онд Дотоодыг хамгаалах газраас устган шатаажээ. (С.Чулуун, Н.Маралмаа)