Сэцэн хан аймгийн Ачит Чин ван Сансрайдоржийн хошууны Даш Яйчил уулын овооны өвөрт байгуулжээ. Анх Манжийн Бадаргуулт төрийн аравдугаар он (1884)-д засаг бэйс Лаваанрэгзэн, Төвд хамба Лувсандаржаа нар Даш Яйчил уулын өвөрт “Гандан пэрэнлэйдаржаалин” хэмээх сүм байгуулж олон зүйлийн хурал ном хуруулав. Мөн Майдар бурхан залж хүрээ эргүүлэх тэргүүнийг үйлдүүлэв. Бадаргуулт төрийн хорьдугаар он (1894)-д засаг бэйс Лаваанрэгзэнгийн үед Ламрин дацанг сүмийн хамт нэмэн байгуулжээ. Олноо өргөгдсөний тавдугаар (1915) онд засаг бэйс Сансрайдоржийн үед Дашчойнхорлон, Дашдэндэвлин хэмээх хоёр аймаг зохиож хурал ном хуруулжээ. Үүнээс гадна тус сүмд Ачит Чин вангийн хошууны Эрдэнэ мэргэн тунгаагч бишрэлт номч билэгт хувилгаан Довчин гүүш байв. Тэрээр Бадаргуулт төрийн 14-р онд Богд ламаас хувилгаан ямба шагнагджээ. 19-р онд Эрдэнэ мэргэн бандид цол олгуулжээ. 1911 онд Тунгалаг бишрэлт цол шагнал хүртээжээ. 1915 оноос Богд хааны газраас тусгайлан зарлиг гаргаж уул хошууны дотроос түүний харьяат занги Бадрахын сум ба хиа зовлон залбирагч шавь болох хэмээсэн хүн нарын хамтаар шавь болгон оруулж харьяат сүм, хурлыг эрхлэн залгамжлуулахаар шагнан хүртээсэн юм. Ийнхүү Эрдэнэ мэргэн хувилгаан суух болжээ. (С.Чулуун, Н.Маралмаа)