Хамаа бүхий үг | Их Монгол улс, Чингис хаан, Шихихутаг, Их Заргач |
Цаг үе | XIII-XIV зуун |
Салбар, чиглэл | Түүх |
Үндэслэн байгуулагч | Чингис хаан, Шихихутаг |
Угсаа | монгол |
Бүс нутаг | Монголын эзэнт гүрний нутаг дэвсгэр |
Үүсч байгуулагдсан он цаг | 1206 |
Их Монгол улсын төрийн үндсэн гол хууль нь “Их засаг” байв. Уг хууль бидний үед бүрэн эхээрээ уламжлагдан ирээгүй ч бичигдэл хууль байсан гэдэг нь түүхэн сурвалжуудад тэмдэглэгдэн үлджээ. Улсын дээд заргач нь хаантай зөвлөн, хааны нэрийн өмнөөс шүүн таслах ажиллагаа явуулах, хаан төрийн “үзэх нүд, сонсох чих” болж улс үндэсний аюулгүй байдлыг сахин хамгаалах, шинээр байлдан эзэлсэн газар нутаг, дайны олзыг хувь тэнцүүлэн хуваах, зарга ялгаснаа хөх бичиг, цагаан цаасан дээр бичиж дэвтэрлэх үүрэгтэй болжээ. 1206 онд Чингис хаан Шихихутагт Гүр иргэний хувь хувилсныг, зарга заргалсныг хөх дэвтэрт бичиж, дэвтэрлэж ургийн ургаар хүртэл Шихихутагийн надад эетэж, ёсолж хөх бичиг цагаан цаасанд дэвтэрлэснийг бүү егүүтгэтүгэй. Егүүтгэх хүмүүн алдалтан болтугай хэмээн зарлиг болжээ.
“Их засаг” хуульд хаан өргөмжлөх, их хуралдайг зарлан хуралдуулах, гадаад улс оронтой харилцах ёс, цэргийн болон иргэний үүрэг, алба татвар, эрүүгийн болон иргэний шинж чанартай олон асуудлыг хэрхэн зохицуулахыг хуульчлан заажээ. “Их засаг” хуулийн зарчим эзэнт гүрний хэмжээнд үйлчилж байлаа.
“Их засаг” нь цэрэг иргэний төрийн шинж чанар хийгээд нүүдэлчин ахуйн өвөрмөц онцлогийг тусгасан хууль гэдгээрээ онцлогтой. Монголын түүхийн сурвалж бичгүүдэд “Их засаг тунхаглав”, “их засгаар засаглав” хэмээн тэмдэглэсэн нь бий. “Их засаг” хуулийн үндсэн бүрдэл нь 1206 онд бий болсон бөгөөд түүнээс хойш тухайн үеийн нөхцөл байдалд зохицуулан нэмэлт оруулах журмаар баяжуулж ирсэн гэж судлаачид үздэг. Өгэдэй хаан хаан өргөмжлөх ёслол дээр өөрийн “засаг”-ийг анх тунхагласан ба Чингис хааны “засаг”-ийг ч мөн адил сонордуулан хэвээр үргэлжлэхийг батлан зарлажээ. Чингис хааны “Их засаг” хууль түүнийг залгамжлагч хааны үед ч хүчин төгөлдөр мөрдөгдөж байсан нь олон баримтаар нотлогдоно. Шинээр хаан өргөмжлөх их хуралдай буюу алив хэрэг заргыг шийтгэхдээ шүүх хурлын эхэнд Чингис хааны “Их засаг” хуулийг уншин сонсгодог байжээ. “Их засаг” хууль нь улс орны төрийн болон нийгэм улс орон даяар дагаж мөрдөх хэм хэмжээг заан тогтоосон байдаг. Их Монгол улсад тогтоосон хэм хэмжээ нь ард иргэдийн тайван амьдрал хийгээд хуулиа чандлан сахидаг хэв журам улс даяар тогтоож хуулийн хүрээнд амьдрах тэр л нөхцөлийг хангаж өгчээ. “Их засаг” хууль нь Их Монгол улсын нийгэм, эдийн засаг, улс төрийн тусгал болж тухайн нийгмийг олон талаас нь тусган харуулсан томоохон эх сурвалж юм. “Их засаг” хуулийн анхны эх нь олдоогүй учраас ямар бүтэц агуулгатай байсан, хэзээ анх батлагдан гарч төр нийгмийн асуудлыг хэрхэн зохицуулж байсан нь өнөө хүртэл тодорхойгүй. (С.Цолмон)
Юань улсын судар (монгол хэлээр)
Далай Ч., Их Монгол улс, УБ., 2006
Минжин Ц., Их засаг, УБ., 2009
Минжин Ц., Их Монгол улсын заргач Шихихутуг, УБ., 2011
Монгол улсын түүх, дэд боть, УБ., 2003
Нацагдорж Ш., Чингис хааны цадиг, УБ., 1991
Цэрэнбалтав С., Минжин Ц., Тэмүжин-Чингис хааны Их засаг хууль, УБ., 2006
Тус толийн талаарх санал хүсэлтээ
contact@mongoltoli.mn хаягаар ирүүлнэ үү.
© Монголын түүх 2016 он