Жонон нь угтаа Дай Юань улсын үед их хааныг төлөөлөн уугуул Монгол нутгийг захирдаг байсан хан хөвгүүний цол болох “цзинь ван (晉王)” хэмээх албан тушаалаас гаралтай гэж үздэг. 1292 онд Хубилай хааны ач Гамала-г анх цзинь ван өргөмжлөөд Чингис хааны “дөрвөн их орд ба жич цэрэг морь, монгол улсын газрыг бүгдийг захируулжээ”. Хожим нь энэхүү “цзинь ван” цол сунжирч, “жинон (жонон)” болсон ажээ. 

Монголын эзэнт гүрний дараахь үед жонон цолыг сэргээн хэрэглэсэн бөгөөд Тайсун хаан өөрийн дүү Агбаржинг 1438 онд жононгоор томилжээ. 

Ерөнхийдөө энэхүү албан тушаалд их хааны дүү юм уу хөвгүүн томилогдож, хааныг төлөөлөн [Зүүн] Монголын баруун 3 түмнийг захирдаг байв. Гэвч XVI зууны сүүлчээс эхлэн “жонон” цолтой хүмүүс олширч, “хан” цолтны дараа орох эрхэм цол болжээ. Өвөр монголчууд Манжийн эрхшээлд орсны дараахан хэсэг зуур жонон цолыг хэрэглэсэн боловч, удалгүй тус цолыг халжээ. Халхад ч бас 1691 оноос жонон цолыг халсан ажээ.

Түүнээс гадна Ордос дахь Чингис хааны тахилгын газрын үйл ажиллагааг эрхлэн захирдаг албан тушаалтныг жонон хэмээн нэрлэдэг байсан нь угтаа Баруун гурван түмний жонон Чингис хааныг тахилга тайлгыг хариуцан эрхэлж байсны улбаа гэж үздэг. (Ц.Цэрэндорж)