Сэцэн хан аймгийн Боржигон Сэцэн вангийн хошууны нэг томоохон хийд баруун, зүүн Чойрын хийд юм.

    Зүүн чойр нь Дорноговь аймгийн Сүмбэр сумын Цагаан-овоо хэмээх газарт Тэнгэр тэтгэсний 43-р он /1779/-д, Баруун Чойр нь Төр Гэрэлтийн хорин тавдугаар /1845/ онд Засаг бэйл Гончигжавын үед байгуулсан Дорноговь аймгийн Даланжаргалан сумын нутаг Бага нарт хэмээх газар оршино. Зүүн Чойр нь 10 орчим дацан, дугантай 13 жастай. 791 ламтай хэмээн ХХ зууны эхэнд бүртгүүлжээ. Нийт сүмийн талбай 900 кв.м талбайтай. Энэ хоёр хийдийг ард олон ихэр хоёр Чойр ч гэж нэрийдэх амой. Үнэхээр энэ хоёр хийдэд хурал хурж, хөрөнгө нийлүүлэх зэрэг нь хамт байсан тохиолдол буй.

    Тухайлбал 1916 онд Зүүн, Баруун Чойр хийдэд өвөл зуны цагт хурдаг ганжуур, маань, мэгзэмийн бүтээл зэрэг хуралд үйлчлүүлэхийн тулд 10 хоногийн хугацаагаар хар бор ажил хийлгэх зарлагад хүн 57, тогооч 32, ус зөөгч 15-ыг албадан дайчилсны дээр хуралд хэрэглэх аргал 5860 дөрвөлжин, мөн зузаан цай 5650-6000, мөнгө 306 лан, эр, эм хонь 80, шар тос 2000 жин, аарц ба өрөм, 1000 агаруу, эсгий 8, хушга, самар 9000, цагаан гурил 7085 жин, үхрийн мах 67, майхан 46, гэр 22, ачих хонтой тэмээ 2, тус тус нийлүүлжээ. Зүүн Чойрын хийд нь 1938 онд устгагдаад 1990 онд шашин, номын үйл ажиллагааг нь сэргээсэн байна. (С.Чулуун, Н.Маралмаа)