Таваас дээш насны агталсан эр тэмээ: атан тэмээ (нас бие гүйцсэн, агталсан ат) - Атан тэмээ томоо дэлгэрэнгүй...хө, ачаа тэгнээ даанаа хө. Хүүхдийн дуу., дөрвөө дарсан ат (арван настай ат буюу дунд хоёр үүдэн шүдний ирмэг элэгдэж ирэхийг нэрлэсэн нэр), ширээ ат (босоо бөхтэй тэмээ), атан тэмээг аргамжийн хүчээр ачдаг [зүйр цэцэн үг] (атан тэмээ тэнхээтэй тул татлагын хэрээр ачаалах гэсэн санаа), атан тэмээ ангас гэнэ, аралжийн үзүүр гялс гэнэ [оньсого] (мэлхий, могой), ат нь арзгар, буур нь бурзгар [оньсого] (гүзээ, сархинаг), атны мөр арван жил балрахгүй [оньсого] (гэрийн буйрын ором), дээр бүрэн морь, дөрвөө дарсан ат, дөч хүрсэн эр ёстой ид байдаг [зүйр цэцэн үг] (насанд хүрсэн, ямар ч ажил үүрэг гүйцэтгэх чадвартай болсон гэсэн санаа), үхсэн буурын толгойноос амьд ат айна [зүйр цэцэн үг] (нэр сүр, хүч чадлаас нь айх гэсэн санаа).