1. Буддын шашны дагаж мөрдөх тусгай дүрэм, ёс журам: сахил авах (сахил хүртэх) - Ижий ээ би сахил дэлгэрэнгүй...авч чавганц болох юмсан гэхэд авгай нулимсаа асгаруулав. Ч.Лодойдамба. Тунгалаг Тамир., сахил хүртэх (а. Шашны ёсонд лам хүн гэлэн болох; хар хүн лам болох; эхнэр хүн чавганц болох - Би гавж ламтнаас гэлэн сахил хүртсэн юм шүү дээ гэж хэлээд бурхныхаа шургуулгын нүднээс хадаг гаргаж цаасанд боож өвөртлөв. П.Хорлоо. Багш; б. [шилжсэн] Үсээ хусуулах - Хэн нь сахил хүртэх вэ? гээд үсний тонгорог авав. Б.Ринчен. Үүрийн туяа), сахил алдах (лам, гэлэн, чавганц болсон хүн дагаж мөрдвөл зохих сахилга дүрмээ зөрчих), сахил эвдэх (а. Сахил алдах; б. Шар шувтлах), сахил хайрлах (шашны зэрэг хүртээх), сахил санваар [хоршоо] (буддын шашны сахилга дүрэм), *сахилын лам (хичээмтгий нь хэтэрсэн хүн), дургүй ламд дарж байж сахил хүртээх [зүйр цэцэн үг] (хүний дургүй үйлийг хүчээр хийлгэх гэсэн санаа), сахилаа хаясан лам шашны булай, садар явсан эм гэрийн булай [зүйр цэцэн үг] (садар самуун зан зохисгүй гэсэн санаа);