П.Даш нэртэй хэрэглэгчийн нэмсэн үг болон тайлбарын жагсаалт
Нэмсэн тайлбар:
- Зарим хүмүүс айргийг зөвхөн гүүний саамаар хийдэг гэсэн буруу ойлголттой байдаг. Бог малын, үнээний, ингэний сүүг хөрөнгөлөн исгэж айраг хийдэг бөгөөд богийн, үхрийн, ингэний айраг гэж нэрлэдэг. Гүүний айрагнаас бусад айргийг буцалгаж (чанаж) цагаа болгоод түүнийгээ шүүж ааруул хурууд хийдэг. Хэрэв цагаандаа гүүний айраг хольж ааруул хийвэл түүнийгээ бэсрэгний ааруул гэдэг. Ингэний айргийг зарим хүмүүс ингэний хоормог,ингэний ундаа гэж ярих нь бий. Энэ нь буруу нэршил юм. Учир нь хоормог гэдэг нь богийн исгэлэн айраг таргийг болсон сүүгээр шингэлж хутгасныг хэлдэг. Айраг, хоормог, тараг, буцалгаа гэх мэт нэршил нь тухайн цагаан идээг боловсруулж байгаа технологийн ялгааг илэрхийлсэн байдаг.
- Таргийг бог малын болон үхрийн сүүгээр хийдэг. Ингэний сүү, гүүний саамаар тараг бүрж болдоггүй. Тараг гэдэг нь богийн болон үнээний сүүг буцалгаад бүлээн болмогц хөрөнгө нэмж хутгаад бүрж хийдэг цагаан идээний нэгэн төрөл юм.
Ингэний буцалгаа гэдэг нь ингэний багахан айраган дээр ингэний сүүг бага багаар нэмж буцлагсаар ямарч исгэлэн амтгүй чихэрлэг амттай өтгөн ундаа болохыг хэлдэг бөгөөд шар тос чихэр гурил холивол тэр нь ингэний буцалгаа биш болно. Буцалгааг гол төлөв хавар ботгыг нялх байхад уурагтай сүүгээр хийдэг бөгөөд хаврын ядаргааг тайлах гол ундаа гэж үздэг.
Нийт 3 тайлбар нэмсэн байна.
