1. Мал, амьтанд идэш хоол өгөн тэтгэж амьдруулах - Харин овьёосыг бол зөвхөн тэрэгний болон ажлын морьд тэжээх гэж тарина. Ж.Дамдин. Үймээний жил., тэжээн тэтгэх (асрах, сувилах, өргөх), тэжээн засах [хуучирсан] (эмчлэх, анагаах), тэжээхүй ухаан [хуучирсан] (анагаах ухаан), тэжээх арга [хуучирсан] (эмчлэх арга, анагаах арга), овьёосоор тэжээх (овьёос өгөн өсгөх), өвсөөр тэжээх (өвс өгөн өсгөх), сүүгээр тэжээх (сүүгээр бойжуулах), амиа тэжээх (амьдралаа авч явах), хүчээ тэжээх (хүчтэй болох, хүчээ сэлбэх), сувилан тэжээх (асран тэтгэх), тэжээх тэнхрүүлэх [хоршоо] (асран сувилах) - Аав хүү хоёр өнчин унагаа гараар тэжээн тэнхрүүлээд айлын адуунд тавилаа. С.Эрдэнэ. Гал шарын унага., *олгой тэжээх (гэдсээ тэжээх), *тэжээсэн бяруу тэрэг эвдэх (ачийг санахгүй байх гэсэн санаа);

---

2. Хүнийг өсгөн бойжуулж хүмүүжүүлэх - Үүнийг хүсэхийн учир нь, хоёр нярай хүүхдийг арчлахад ажил төрөл орхигдох ба тэжээх тэтгэхэд бэрхтэй болно. Ц.Дамдинсүрэн. Гологдсон хүүхэн., тэжээсэн эцэг эх (үрчлэн авч өсгөсөн эцэг эх), амь тэжээх (аж төрж амьдрах), гэдэс тэжээх (амиа тэжээх, амьдрах), эхнэр, хүүхдээ тэжээх (аж амьдралаа авч явах), тэжээх тэтгэх [хоршоо] (асрах, бойжуулах, өргөх);

---

3. Айлаас хүүхэд өргөж авах: тэжээсэн хүүхэд (үрчлэн авч өсгөх), тэжээсэн эх (үрчлэн авч өсгөсөн эх), бэр тэжээх (багаас нь гэртээ авчирч тэжээн бэр болгох);

---

4. [шилжсэн] Муу зүйлийг арилгаж устгахгүй хадгалж байлгах: өвчин тэжээх (өвчнөө эмчлүүлэхгүй байх);

---

5. [шилжсэн] Арчлах, сувилах: бие тэжээх (биеэ арчлах, тордох).