Хэвлэх


2024-03-29 04:48:32http://mongoltoli.mn/

АЯНГА

1. Агаар мандалд хуралдсан цахилгаан цэнэг газарт буух үзэгдэл - Танай нэг үхрийг аянга ниргэчихлээ. П.Лувсанцэрэн. Хөдөөгийн дуун., аянга буух (а. Агаарт хуралдсан цахилгаан цэнэг газарт бууж, гал цахих мэт болох; б. [шилжсэн] Ихэд уурлаж аашлах), аянга гялбах (аянгын гэрэл гялбах), аянга дайрах (аянганаас үүссэн цахилгаан цэнэгт өртөх), аянга зайлуулагч (аянганы хөнөөлөөс сэргийлэн хамгаалах төхөөрөмж), аянга ниргэх (а. Хүчтэй аянга буух; б. Аянга дайрах), аянганд ниргүүлэх (цахилгаанд цохиулах), аянга сэлгүүр (гаднаа антенныг радио дамжуулагчаас салгаж, газардуулагчтай холбодог гар залгуур), аянгын сарниулагч (барилга байгууламжийг аянга цахилгаан дайрахаас хамгаалан газартай холбосон төмөр шон, утас зэрэг хэрэгсэл), бөмбөгөн аянга (бөөрөнхий цахилгаан цэнэг), аянга мөндөр [хоршоо] (тэнгэрт хуралдсан цахилгаан цэнэг болон агаарын мөсөн тунадас) - Арьяа арьяа салхилуулсаар аянга мөндөр буулгасаар байв. Халх ардын тууль., аянга цахилгаан [хоршоо] (агаарт хуралдсан цахилгаан цэнэг) - Хууччуулын ярихыг сонсвол, зуны цагт тэр цохион дунд зуншихад осолтой, тэнгэрийн дуу их, аянга цахилгаан буух нь олонтоо гэлцэнэ. С.Дашдооров. Говийн өндөр., *аянга буулгах (ихэд уурлах, хилэгнэн загнах) - Чамд юу гэж аянга буулгадаг билээ гэж эцэг нь асуулаа. Б.Бааст. Хоёр хун;


2. [хуучирсан] Урьд цагийн хүмүүсийн төсөөллөөр бол тэнгэрээс буудаг аймшигтай, аюултай юм: аянгын сум (энэхүү зэвт сум бол хүн төрөлхтөний хүрэл зэвсэгтэй байхад эдэлж байсан зүйл бөгөөд урьдын цагт хүмүүс үүнийг бороо орж цахилгаан цахих үед тэнгэрээс буудаг сум гэж үздэг байв) - Аянгын сум бяцхан ч, аварга модыг задлах гэсэн үг байдаг. В.Шарма. Таван сургамж.

--oOo--