Тодорхой хугацааны аж ахуйн орлого, зарлагыг нарийн тоолж тодорхойлсон дүн - Олз олох байтугай өр ширэнд унах маш муухай тооцоо гарсанд гол нь харлан царай нь шарангуйлав. Д.Намдаг. Цаг төрийн үймээн., тооцоо бодох (а. Тооцож бодох, бүртгэх; б. [шилжсэн] Өш санах, хариугаа авах), тооцоо гаргах (хүн, амьтан, эд зүйлийг бүртгэн дүн мэдээ гаргах), тооцоо дуусгах (а. Хийж байсан тооцоогоо дуусгах; б. [шилжсэн] Хариугаа авах; в. [шилжсэн] Ажлаасаа бүрмөсөн гарах), тооцоо хийх (а. Ямар нэг бүртгэл тооллого хийх - Английн стерлинг мөнгөөр тооцоо хийх журмыг дагав. Б.Ринчен. Өмнө этгээдэд зорчсон тэмдэглэл; б. [шилжсэн] Хариугаа авах - Тэр үймээний эзэдтэй бид тооцоо хийх ёстой. Б.Нямаа. Арандалынхан), тооцоо хөтлөх (данс бүртгэл хөтлөх), тооцооны дэвтэр (тооцоо хийх дэвтэр), тооцооны ня-бо (янз бүрийн тооцоо хариуцсан нягтлан бодогч), тооцооны хэвлэлийн хуудас (дөчин мянган үсгийн тэмдэгттэй тэнцэх зохиол бүтээлийн хэвлэлийн нэгж хэмжүүр), аж ахуйн тооцоо (а. Улсын төсвөөс тусламж авалгүй орлогоороо зарлагаа нөхөх зарчимд үндэслэн үйлдвэр, аж ахуйг төлөвлөгөөтэй хөтлөх арга; б. Хувь хүн, албан байгууллага, аж ахуйн нэгж, үйлдвэр үйлчилгээний газрын орлого зарлагаа хөтлөх данс), нарийн тооцоо (нягт нямбай бүртгэл), хатуу тооцоо (нарийн чанд, хяналт сайтай байдал), тайлан тооцоо [хоршоо] (орсон зарсан зүйлийн бүртгэл, түүний тооцоо), данс тооцоо [хоршоо] (данс бүртгэлийн дүнг үндэслэсэн тооцоо).