1. Биеийн ерөнхий хүч чадал, тэнхээ - “Байзаач, би жаахан унтаад…” гэж гуймаар болтлоо тамир тасарна. П.Лувсанцэрэн. Хөдөөгийн дуун., тамир алдах (биеийн чадал тэнхээ сулрах), тамир алдрах (бие суларч тэнхээ доройтох), тамираа барах (ямар ч хүч чадалгүй болох), тамир орох (чадал суух, бие чангарч сайжрах), тамир доройтох (биеийн чадал тэнхээ дордох), тамир тасрах (ир чадал барагдаж, хүч сэлбэж дийлэхгүй болох), тамирын засал (зориулалтын багаж төхөөрөмжөөр яс, булчин зэрэг хөдөлгөөний эрхтэнг эмчлэн засдаг биеийн тамир, эмчилгээний арга), ажлын тамир (хөдөлмөрийн чадвар), тамир муутай (сул дорой), тамир тэнхээ [хоршоо] (бяр чадал, хүч тэнхээ) - Залуу чийрэг биеийн хүчээр хавар нь тэнхээ тамир, цог жавхаагүй боловч эрүүл хүн болжээ. Ч.Лодойдамба. Тунгалаг Тамир., тамир тэнхээ орох (хүч тэнхээ орох), тамир тэнхээ сорих (а. Уралдаан тэмцээнд оролцох; б. Хүч тэнхээ шаардсан ажил хийх), тамир тэнхээ барах (хүч чадал барах, бяр тэнхээ барах), тамир тэнхэл [хоршoo] (тамир тэнхээ) - Усны бараа харагдсангүй тамир тэнхлээ барагдтал гүйлээ. Монгол ардын домог үлгэр., тамир хүчин [хоршoo] (бие чадал хүч, тэнхээ) - Тэнд нүүн ирж хэдэн жил тамир хүчнийг тэжээв. В.Инжаннаши. Хөх судар., тамир чадал [хоршоо] (хүч тэнхээ), хүч тамир [хоршoo] (тэнхээ, чадал) - Эхийнхээ хамаг хүч тамир, мар мярааг авч төрсөн мэт эрүүл сайхан биетэй, булцгар хацартай хүү нь зүлэг ногоон дээгүүр дэвхцэн гүйнэ. С.Эрдэнэ. Хонгорзул., тамир шим [хоршoo] (үржил шим) - Газар газрын өсөлт боловсролт, тамир шим, үрс шимсээр өөр өөрийн ундрал амьдралаар явах мэт. В.Инжаннаши. Хөх судар., тар тамир [хоршоо] (хүн, амьтны ир чадал, тэнхээ, танаг);

---

2. Бяр тэнхээ: тамираа үзэх (хүч тэнхээгээ сорих), сэтгэлийн тамир (сэтгэлийн тэнхээ) - Сэтгэлийн тамирыг тэжээсний хүчээр үхэлгүйн рашаан таван махбод төгөлдөр Аюуш бурхны бумбыг олохыг зүүдлэн суултай. Д.Равжаа. Зохиолын эмхэтгэл;

---

3. Бие бялдрын хөгжил, боловсрол: биеийн тамир (бие махбодыг сэргээх, хөгжүүлэхэд ашиг тустай дасгал сургууль) - Отрядын хэмжээгээр явагдах биеийн тамирын тэмцээнд шуурхай бэлтгэ! гэв. Г.Дүйнхэржав. Арилшгүй мөр., биеийн тамирын хүмүүжил (хүний бие махбодыг чийрэгжүүлэх зорилгоор олгодог хүмүүжил), биеийн тамирын хөдөлгөөн (бүх нийтийн эрүүл мэндийг сахин хамгаалах, сайжруулах бодлого), биеийн тамир хийх (биеийн тамир тэнхээг сэргээх дасгал хийх),

---

4. Цусны судас; цусан тамир (цусны судасны хүчдэл), тамир гол (гол судас, улаан гол);

---

5. [шилжсэн] Дотуур бодол, далд санаа: гадуур тамир (а. Биеийн хүч чадал; б. Хуурамч зан), дотуур тамир (муу санаа, хувиа хичээсэн байдал), дотуур тамиртай хүн (далд муу санаатай хүн).