1. Албан бичиг зэрэгт дарах, засаг төр, захиргааны байгууллага, албан газар, улсын болон хувийн аж ахуй нэгжүүдийн баталгаа болгож төмөр, мод, чулуу, эвэр, яс зэргээр хийсэн оноосон нэр, сүлд бүхий бар тэмдэг: албаны тамга (албан ажлын хэрэгцээнд ашиглах тэмдэг), төрийн тамга (улсын тусгаар тогтнол, бүрэн эрхт байдлын бэлгэ тэмдэг бөгөөд олон улсын гэрээ, хэлэлцээр зэрэг төрийн эрх барих дээд байгууллагаас гаргасан хууль цаазын дээд хүчин төгөлдөр актыг батламжлахад хэрэглэдэг тэмдэг), тамга барих (а. Тамга хэрэглэх эрхтэй болох, тамга хадгалах; б. [шилжсэн] Хариуцлагатай алба хаших), тамга дарах (тэмдгээ дарах), тамга сийлэх (тамга хийх), тамгаар барлах (тамга дарах), байгууллагын тамга (байгууллагын эрх мэдлийн баталгаа болсон тэмдэг), тамга хугалах (тамганы лац задлах), тамга цутгах хороо [түүх] (тамга хийх цутгах газар), тамгыг сахих өчүүхэн салаа [түүх] (явуулж буй бичигт тамга дарах ажлыг хариуцах хэсэг), тамгыг харгалзах газар [түүх] (сангийн яамны тамга дарах газар), тамга битүүмжлэх (оны хамгийн сүүлийн сарын 19-21-ний өдрүүдэд албан байгууллагууд тамгаа битүүмжлэх ёслол), тамга нээх (шинэ оны эхний сарын 19-21-ний өдрүүдэд битүүмжилсэн тамгаа нээх ёслол), тамга өргөмжлөл [хоршоо] (а. Албан тушаал, тамга тэмдэг; б. Эрх мэдэл) - Хэрвээ эзэн нь ховдог ужид, түшмэд нь зальхай зусар болоод, эрэх нь эд ашиг, хүсэх нь жаргал цэнгэл болбоос хэдий тэдгээр тамга өргөмжлөл ба алт торго байвч эгнэгт юуны тус аж. В.Инжаннаши. Хөх судар;

---

2. Адуу мал, эд зүйлд тэмдэг болгон хайрах төмөр хэрэгсэл, түүний ором: саран тамга (хагас саран хэлбэртэй тамга) - Саран тамгатай зээрдээрээ сарын газрыг товчилно доо хө. ААЗ., чандмань тамга (гурван дусал бүхий тамга), тамганы сорви (морь малыг тамгалсан ором), им тамга [хоршоо] (малыг таньж мэдэх тусгай тэмдэглэгээ), тамга тэмдэг [хоршоо] (а. Хуучин цагт ноёдын сүрэг малыг ялгамжлах тэмдгийг тамга гэж, албат хамжлага ардын өмчийн малын таниулах дүрсийг тэмдэг гэдэг журамтай байв; б. Им тамга; в. Төрийн ажил явуулахад хэрэглэх бар тэмдэг) - Мал тус бүрд таних тамга тэмдэг тавив. А.Дашням. Өлзийнарангийн өчил., тамга үсэг (а. Тамга тэмдгийн бичээс; б. Хэвлэлийн үсэг);

---

3. Хөзрийн нэг зүйл дүрс тэмдэг: тамгаар дарах (хөзрийн дээд модоор дарах), бундангийн тамга (хөзрийн бундан буюу зүрхэн хэлбэртэй дүрсийн хамгийн том мод).