1. Үрэгдэл, чирэгдэл, зардал, үрж сүйтгэх зүйл: хулгайн сүйтгэл (хулгайд үрэгдсэн юм, алдагдсан зүйл), сүйтгэл ихтэй (хохирол, үрэгдэл ихтэй), сүйтгэл бүрэлгэл [хоршоо] (ямар нэгэн юмыг үрэн таран хийж устгах нь), алдагдал сүйтгэл [хоршоо] (орлогоос давсан зардал чирэгдэл), гарз сүйтгэл [хоршоо] (эд хөрөнгөд учрах хохирол болон зардал чирэгдэл), зардал сүйтгэл [хоршоо] (төлөвлөсөн зүйлийг хийхэд гарах бэл, мөнгө) - Ер нь манай сургуульд ямар ч зардал сүйтгэл орохгүй. Ц.Уламбаяр. Зовлон жаргал., хохирол сүйтгэл [хоршоо] (алдаж сүйдсэн юм, түүнээс гарах алдагдал) - Улс эх оронд үлэмж хохирол сүйтгэл тарьсан гунигт хар бослого төдхөн дарагджээ. Б.Бааст. Алтайн хөх дөнөн., чирэгдэл сүйтгэл [хоршоо] (ямар нэгэн ажил төрлийг хийж гүйцэтгэхэд түвэг бэрхшээл ихтэй, зардал мөнгө их шаардагдах нь), сүйтгэл бага орох ажил (зардал бага орох ажил);

---

2. Өр төлөөс, төлбөр: дайны сүйтгэл (дайны төлөөс), өр сүйтгэл (өр төлбөр) - Товуудай бага залуудаа алба өртөө улаа ба хулгай худлын өр сүйтгэл, түнш наймааны өр ширийг хүртэл төлөх зэргийн хэлмэгдэл дарлалыг үзжээ. С.Буяннэмэх. Түүвэр зохиол., үнэ сүйтгэл [хоршоо] (а. Зардал; б. Өр төлбөр);

---

3. Хуулийн байгууллагаас хэрэг зарга мэдүүлэгчдээс гаргуулан авах юм: сүйтгэл төлөх (хохирлыг барагдуулахаар татаас, төлбөр төлөх), торгууль сүйтгэл [хоршоо] (ял зэмийн төлөөс болгож авах зүйл).