1. Нэгийг өгч нөгөөг оронд нь авах - Нэгдлийн олигтой малыг толгой төдий малаар солих явдал ч байна л даа. Ц.Ням-Осор. Юу гэнээ хөө., мөнгө солиулах (мөнгөн тэмдэгтийг өөр орны мөнгөн тэмдэгтээр арилжих) - Хамт яваа орос нөхөд бас хэдэн төгрөг солих гэж тэдэнд хэлмэрчилж өглөө. Б.Ринчен. Өмнө этгээдэд зорчсон тэмдэглэл., номоор солих (ямар нэгэн зүйлийн авахын тулд номоо бусдад өгөх), сольж авах (өөрийн ямар нэгэн зүйлийг оронд нь өгч бусдын юмыг авч хэрэглэх) - Сайн угсааны буур, бух, азарга, хуц, ухныг харилцан сольж авалцах өгөлцөх зэргээр өөр өөрийн малын чадал хүч ба угсааг улам сайжруулжээ. С.Буяннэмэх. Түүвэр зохиол;

---

2. Нэгийг нөгөөгөөр орлуулах, өөрчлөх, халах: мэргэжил солих (шинэ, өөр мэргэжлээр ажиллах) - Бурмаа мэргэжил сольж жолооч болсон нөхрөө гэрийн бараа харахгүй шахам яваад байхаар нь цөхөрсөн. Ж.Бямба. Их аяныхан., нэрээ солих (нэрээ өөрчлөх) - Чиний санаанд тохируулан нэрээ хүртэл солив. Ц.Дамдинсүрэн. Түүвэр зохиол., хувцас хунар солих (хувцсаа сэлж өмсөх) - Нэг өдөр Ханд хувцас хунарыг нь солихоор цай хоол барьсаар тэнд очив. Т.Дэчингунгаа. Өөдрөг зам., сольж тавих (уг байсан зүйлийг өөр юмаар орлуулж тавих) - Солиод тавьчихаар хэн ч сэжиглэхгүй шүү дээ гээд явчхав. Н.Банзрагч. Зам., халах солих [хоршоо] (халаа сэлгээ хийх), сольж тавьж, солбиж хийсгэх [зүйр цэцэн үг] (ямбалан алхах гэсэн санаа);

---

3. Сэлэх, нүүх: нутаг солих (өөр нутагт нүүх, шилжих), байраа солих (байраа сэлгэх) - Ингэж хэдэн тийш байр соливол дэлт саарал намайг хаана байгааг мэдэхгүй будилах болов уу гэж тэр горилжээ. Б.Бааст. Алтайн хөх дөнөн., бууц солих (буурь бууцаа сэлгэх) - Бууц солих гэдэг нь эрүүл цэвэр газар буухыг гэнэ. Ж.Самбуу. Мал маллагааны арга туршлага;

---

4. Ярих - Хэдэн үг соливол юу ярьдаг хүн юм бол? гэж бодов. Ж.Пүрэв. Гурван зангилаа;

---

5. Хутгах, самууруулах: холих солих [хоршоо] (юмыг хооронд нь нийлүүлж будлиантуулан юмны бүтэц бүрэлдэхүүнийг алдагдуулах) - Мал хар нууж дарах, солих холих мэт хэрэг мэр сэр гараад байдаг биз. Ц.Ням-Осор. Юу гэнээ хөө.