1. Салаалж гарсан хэсэг, салаа: салбар уулс (нэг уул нуруунаас салаалсан уул) - Алтайн нурууны салбар цаст уулс хүрээлсэн Ховд аймгийн Мөнх хайрхан суманд төлийн баяр үзсэн минь сэтгэлд тодхон, санаанд илхэн байна. Б.Бааст. Алтайн хөх дөнөн., салбар суваг (гол сувгаас салан гарсан ус дамжуулах суваг), салбар утга (үгийн гол утгаас салаалж гарсан үүсмэл утга) - Тэр үгийнхээ салбар олон утгыг нарийн судалж… хэрэглэх нь зүйтэй юм. Р.Жагварал. Монгол хэлний хүндэтгэлийн үг., замын салбар (зам хэд хэдэн тийш салаалан салсан нь), хэлхээ салбар [хоршоо] (бие биетэйгээ салшгүй холбоотой бүхэл зүйлийн нэг хэсэг);

---

2. Албан байгууллагад харьяалагдах нэгж; холбооны салбар (холбооны төв байгууллагаас иргэдэд хүндрэл учруулахгүй, түргэн шуурхай үйлчлэх зорилгоор дүүрэг, сум зэрэгт байгуулсан холбооны газар) - Тэд хичээл тармагц л холбооны салбар руу очиж захиагаа явуулахыг яаран хүлээж байсан. С.Лочин нар. Галтай залуу нас., шинжлэх ухааны салбар (шинжлэх ухааны байгууллагад харьяалагдах нэгж) - Шинжлэх ухааны салбаруудад гарсан тэргүүний бүтээлд жил бүхэн олгодог уламжлалт шагналыг саяхан олгосон тухай мэдэгдсэн байна. “Цог” сэтгүүл., эмнэлгийн салбар (хүн, амьтныг эмчлэн сувилах байгууллагын нэг хэсэг), цэргийн салбар (цэргийн байгууллагын бүрэлдэхүүн хэсэг), анги салбар [хоршоо] (мэргэжил болон хийж гүйцэтгэх ажлын зорилгоор нь хэсэглэн хуваасан албан байгууллага доторх нэгж) - “Бүх юм бэлэн болсон тухай” их барилгын анги салбарын дарга нар удирдах хүмүүстээ товч тодорхой илтгэж байв. М.Чойжил. Андын нутаг алсдахгүй., хэлтэс салбар [хоршоо] (албан байгууллага доторх тухайлсан ажлын нэгж).