1. Дэлхийн бөмбөрцөг хийгээд бусад одон цогцыг багтаасан хязгааргүй огторгуй - Орчлон дээр нэг дор ингэж олон хүн амьдарч болдог юм байх нь ээ. С.Лочин. Сэтгэлийн өнгө;

---

2. Орон цагийн хувьд хязгааргүй хэлбэрээр төгсөлгүй оршин буй материаллаг бүх ертөнц, аливаа бодис ба тэдгээрийн орших хэлбэрийн ерөнхийлөл: орчлон хорвоо [хоршоо] (бидний амьдарч буй дэлхий ертөнц), орчлон дэлхий [хоршоо] (дэлхийн бөмбөрцөг дээрх газар нутаг, ертөнц) - Орчлон хорвоогийн явдлыг огоорч мартаж болохгүй… Монгол ардын дуу., *орчлонгийн мөнх бусыг үзүүлэх (орчлонгоос одох), орчлонгоос одох (нас барах), *орчлонгийн улаан тоос (хорвоо ертөнцийн хэрэг явдал) - Орчлонгийн улаан тоосноос ангижран бясалгал хийвэл үнэний мөр олж болно. Б.Ринчен. Үүрийн туяа., *орчлонгийн тоос хөдөлгөх (амьд явах), олонд зэмлэгдэж, орчлонд жигшигдэх [зүйр цэцэн үг] (олонд хүндгүй болох гэсэн санаа), орчлон нараар гийдэг, хүн эрдмээр гийдэг [зүйр цэцэн үг] (орчлон дэлхийг нар гэрэлтүүлдэг бол хүнийг эрдэм ном гэрэлтүүлдэг гэсэн санаа).