1. Өглөө гэдгийн эсрэг утга өдрийн төгсгөл, үдэш - Гэрийн зүг явахдаа өдий орой болсон хойно гэрэлтэй байгаа цонхоо харав. С.Лочин. Сэтгэлийн өнгө., орой болох (нар жаргаж эхлэх), оройн бүрий (нар шингэсний дараах харанхуй бүрэнхий байдал) - Орой бүрий болсонд олон зэргээр мордолцов. Д.Намдаг. Түүвэр зохиол., оройн сонин (үдшийн сонин), оройн хоол (орой идэх хоол), оройн ээлж (үдшийн ээлж), оройн долоон цаг (үдшийн долоон цаг), оройн сургууль (ажлын бус цагаар хичээллэж, дээд, дунд боловсролтой мэргэжилтэн, мэргэжилтэй ажилтан бэлтгэдэг сургалтын хэлбэр), өглөө орой [хоршоо] (өглөөнөөс аваад үдэш хүртэлх хугацаа), орой үдэш [хоршоо] (нар шингэснээс хойших хугацаа), шөнө орой [хоршоо] (үдшээс үүр цайх хүртэлх хугацаа), огт хийгээгүйгээс орой хийсэн нь дээр [зүйр цэцэн үг] (цаг хугацаа хожимдсон ч гэсэн хийх хэрэгтэй гэсэн санаа);

---

2. Тухайн цаг хугацааны ихэнх нь өнгөрсний дараах эцсийн хэсэг - Нар ч орой боллоо. Д.Гонгор. Д.Сүхбаатарын тухай дуртгалууд., намар орой болох (намрын сар дуусах дөхөх);

---

3. Болзсон, тогтсон цагаас хожуу хугацаа: орой ирэх (хоцорч ирэх) - Бид орой ирсэн тул найр наадам хэдийнээ эхэлчихсэн байв. Д.Намдаг. Түүвэр зохиол., орой төллөх (төллөх хугацаанаас хожимдож төллөх), эрт орой [хоршоо] (хэзээ нэгэн цаг) - Чоно тэжээсэн хүн эрт орой хэзээ нэгэн цагт хоолойгоо тасдуулах бололтой. Б.Бааст. Алтайн хөх дөнөн., орой унтвал нэгийг сонсох, эрт босвол нэгийг үзэх [зүйр цэцэн үг] (сэргэлэн соргог байвал ямар нэгэн шинэ зүйл мэдэж авч чадна гэсэн санаа).