1. Ямар нэгэн зүйлийн бусдаас ялгарах шинж чанар нь илт давуу, дээд зэргийн - Тэр ер нь ийм л жирийн мөртөө санаанаас гарахгүй үг хэлчихдэг онцгой ухуулагч юмсан. Ш.Гаадамба. Элбэг дээл., онцгой байдал (байгалийн гамшиг, улс төрийн хямрал зэргээс улс орны хэмжээнд юм уу, тодорхой бүс нутгийн иргэдийн амар тайван байдал, байгууллагуудын хэвийн ажиллагаа алдагдаж болох нөхцөл байдал), онцгой эрх (төрийн ямар нэгэн байгууллага юмуу албан тушаалтанд хуулиар зөвхөн өөрт тусгайлан олгосон бүрэн эрх), онцгой сайн бүтээл (давтагдашгүй сайн бүтээл), онцгой амжилт гаргах (өмнө нь хэн ч гаргаж байгаагүй дээд амжилт үзүүлэх), онцгой гавьяа байгуулах (их том үйл хэргийг бүтээх), ажилд онцгой үүрэг гүйцэтгэх (ажил хэрэгт голлох, чухал байр суурьтайгаар оролцох);

---

2. Олноос буйд, ганцаараа: олноос онцгой (бусдаас илт ялгарам, содон), онцгой буух (олноос буйд, ганцаар буух), онцгой тасархай суух (бусдаас тасархай, сондгой суух) - Хүүхдүүдээсээ онцгой суугаа хоёр хөгшний нэг зөөлхөн мэгшин уйлав. Л.Дашням. Бурхантын цэцэг., олонтой явбал талын чинээ, онцгой явбал алгын чинээ [зүйр цэцэн үг] (эвтэй найрсаг харьцаатай хүн найз нөхөд олонтой, бодож сэтгэх нь ч уужим, ганцаар зожигрон явах хүн өчүүхэн төдий гэсэн санаа);

---

3. [гүн ухаан] Бодит юм, түүний эсрэг тэсрэг тал болсон нэгж ба ерөнхийг харьцуулж нэгдмэл бүхэл болгон илэрхийлдэг философийн хууль.