Ааг, шар: ямаан омог (өнгөн дээрээ сүржин, огцом түргэн уур), омог нь шатах (ааг, шар нь хөдлөн хөөрөх), омгийг нь дарах (а. Ааг сүрийг нь бууруулах, зориг цөсийг нь мохоох; б. Юмыг эсгэх болон барьж оёхдоо хошуурсан хэсгийг нь нугалах), омог төрөх (ааг, шар нь хөдлөх), омог заах (өөрийн хүчинд бардамнах), омог шантрах (ааг хүч нь буурах), омог төгөлдөр (өөрийн сүр хүчинд итгэл төгс байгаа нь), омог бардам (өөрийнхөө илүүтэйд бардамнах байдал), ааг омог [хоршоо] (хүн, амьтны ид чадал) - Арван хэдэн насныхаа ааг омгоор хөтлөгдөнхөн... Р.Чойном. Хүн., омог зориг [хоршоо] (төрх байдалд илрэх сүр) - Ондоо зүрхийг хийж омог зоригийг нь зөөлрүүлэх хэрэгтэй. Алтан товч., омог сүр [хоршоо] (ид хав, чадал) -  Омог сүр ихэд бадраад шаламгайлан орж байлдсанд Хэрэйдийн цэрэг цөм гэдрэг тэргүүн сүүл дайсанд учирч байлдалгүйгээр бутралдан үүсэв. В.Инжаннаши. Хөх судар., омог хорсол [хоршоо] (ихэд тэчьяадан шаралхах нь), атаа омог [хоршоо] (бусдад ихэд атаархан шаралхах нь), уур омог [хоршоо] (сэтгэл санаа тааламжгүй болж, уурласнаас үүсэх догшин зан ааш, хилэн), омог биеийг зовоодог, улиг бусдыг зовоодог [зүйр цэцэн үг] (бардам сэхүүн зан өөрт зовлон болох гэсэн санаа).