Хэвлэх


2022-01-29 06:25:46http://mongoltoli.mn/

ОВОО

1. Юмыг дээр дээрээс нь тавьж, овоолж шовойлгон босгосон зүйл - Шарилыг нэгэн жижиг толгой дээр оршуулан, тэнд байсан хүмүүс нэг нэг чулуу тавьсан нь том овоо босжээ. Ч.Лодойдамба. Тунгалаг Тамир., шороон овоо (нэг дор хуран бөөгнөрч овоорсон шороо), элсэн овоо (элсэн манхан), цасан овоо (хуралдаж овоорсон цас), сүрлэн овоо (овоолоостой сүрэл), *ясан овоо босгох (хүн, амьтныг үй олноор нь хөнөөх), *махан овоо хийх (хүүхдүүд дүрсгүйтэн нэг нэгийнхээ дээрээс олноор овоорон тоглох);


2. Алсыг харуулдах, эргэн тойрноо ажиглах зорилгоор босгосон өндөрлөг зүйл: манааны овоо (манаач хүний харуулын байр), харуулын овоо (цонж);
3. Хилийн дээсийг тэмдэглэсэн зүйл: хилийн овоо (хилийн тэмдэг);
4. Шашны зан үйлийн дагуу уул, даваан дээр мод, чулуу овоолж босгосон тахилгын тэмдэг: овооны найр (овоо тахисны найр наадам) - Найман аймгийн найман овоо тахисны дараа тэнд цугларсан лам хар их багагүй бүгдээрээ найрлав. Ж.Дамдин. Үймээний жил., овооны эзэн (уул усны эзэн савдаг), овооны тайлга~овоо тахилга (уул усанд өргөл өргөх ёслол) - Маргааш овоо тахилгын наадам хийх гэнэ. Г.Дүйнхэржав. Арилшгүй мөр., овоо босгох (уул даваан дээр чулуу овоолж тахилгын тэмдэг бий болгох), овоо тахих (тахилгын тэмдэгт идээ шүүс өргөн уул усны эздийг аргадан өргөл өргөх), уул овоо [хоршоо] (уул болон уулан дээр босгосон тахилгын зүйл), овоо босгоогүй бол шаазгай хаанаас суух вэ [зүйр цэцэн үг] (хэрэг явдал заавал эх шалтгаантай байдаг гэсэн санаа) - Овоо босгоогүй бол шаазгай хаанаас суух вэ? гэгчээр Долгор эхлээгүй бол Эрдэнэ хаанаас чингэж хатуу сэтгэл гарган орхиж явах билээ. Ч.Лодойдамба. Тунгалаг Тамир., олны буян, овооны хишиг [зүйр цэцэн үг] (олны дэм тусаар олдсон зүйл гэсэн санаа).

--oOo--