1. Жигүүртэн буюу жигүүртэй амьтны агаарт дэгдэн хөөрөх, халих: шувуу нисэх (шувуу агаарт халин хөөрөх) - Хоёр хун нуурын дээгүүр орилолдон нислээ. С.Эрдэнэ. Хонгорзул., хуйлран нисэх (хуйлран хөөрөх), нисэх үнэг [амьтан] (бие нарийн урт, өмнөд хөлийн муруйгаас гуя хүртлээ арьсан жигүүртэй, нэг модноос нөгөө модонд ташин нисдэг нэгэн зүйл амьтан), нисэх хулгана [амьтан] (зурамтай төстэй болоод нисэх үнэгний адил арьсан жигүүртэй нэгэн зүйл амьтан) - нисэх хүн байвал барих хүн байна [зүйр цэцэн үг] (хэдий эрдэм, чадалтай хүн авч түүнээс илүү эрдэм, чадалтай хүн бас байх);

---

2. Өндөр юман дээрээс халин үсрэх: нисэж унах (өндрөөс унах), нисэж үх‎‎‎‎эх (өндрөөс унаж үх‎‎эх) - Өрөөсөн нүд нь сохор юм замын ирмэгийг харсангүй халтирч Гомботойгоо хамт өнхрөн нисэж үхсэн юм. Ц.Дамдинсүрэн. Түүвэр зохиол;

---

3. [шилжсэн] Их хурдан явах: нисэн өнгөрөх (түргэн зуур нисэх мэт одох), нисэх од (их хурдан жирэвхийн өнгөрөх од), нисэх алт (маш нимгэн цаастай адил боловсруулсан, зурах будахад наалдуулан хэрэглэх алт; цаасан алт);

---

4. Далавч бүхий нисэх техник агаарт халин зорчих: нисэх бөмбөлөг (агаарт дэгдүүлэн хөөргөх хальсан бөмбөг; голдуу цаг уурт хэрэглэнэ), нисэх онгоц (далавч бүхий агаарт хөөрөх хөдөлгүүрт хэрэгсэл), нисэх онгоцны буудал (онгоц хөөрөх, буух болон зорчигчдод үйлчлэх иж бүрэн үйлчилгээний газар), нисэх талбар (нисэх онгоцны зогсох, буух газар), нисэх хүчин (улсын зэвсэгт хүчний нэг, агаарын салбар).