1. Буддын шашны нэгэн зүйл уншлагын ном: маанийн ерөөл (нас нөгчигсдийн хойдын буянд зориулж маань унших, ерөөл тавиулах шашны зан үйл), маани унших (тарни унших) - Маани уншиж, наманчилж сууна. Л.Түдэв. Уулын үер., маани мэгзэм [хоршоо] (буддын шашны ёсны нэгэн зүйл уншлагын ном) - Тосгоныхон үхэр малаа эрт гэгч нь хотлуулан, хүүхдээ гэртээ хөөж оруулаад голт бүхэнд зул бадрааж, маани мэгзмээс авахуулаад аль мэддэгээ уншицгаав. Б.Нямаа. Арандалынхан;
2. Арьяабал бурхны зургаан үсэгт зүрхэн тарни:
маанийн хүрд (маанийн зургаан үсэг тэргүүтнийг олонтоо хуйлсан хүрд),
маанийн овоо (а. Маанийн судар буюу хорлоор хийж босгосон овоо; б. Маанийн зургаан үсэгт чулуугаар овоолсон овоо),
*маани тоолох (ажил хэрэгт залхуурч, удаан хойрго хандах),
мааниас өөр номгүй, махнаас өөр хоолгүй [зүйр цэцэн үг] (эрдэм номгүй, чадвар муутай махсаг хүн гэсэн санаа),
маанийн ном номын дээд, мах, сүү хүнсний дээд [зүйр цэцэн үг] (номын дээд нь Арьяабал бурхны зүрхэн тарни, хүнсний дээд нь мах, сүү гэсэн санаа).