1. Хавтгай талбайд аливаа юмны төрх байдлыг гарган хийсэн дүрс: зураг зурах (харандаа бийр, будаг зэргийг хэрэглэн гараар дүрслэн бүтээх), зураг сайтай бичиг (цэвэр үзэмжтэй бичсэн бичиг), зургийн бийр (зураг зурдаг төрөл бүрийн бийр, үзэг), зургийн бөс (тосон будгийн зураг зурдаг, олс зэргээр нэхсэн бөс), зургийн дэвтэр (зурахад зориулсан дэвтэр), зургийн тайлбар (зурагт зориулсан бичээс, зургийн тодорхойлолт), зургийн урлал (уран зураг, сийлмэл, хатгамал, барилга зэрэг элдэв хэрэглэлийн уран чимэглэлийн бүхий л дүрс бүтээх урлаг), зургийн үзэсгэлэн (олонд дэлгэн үзүүлэхээр бэлтгэсэн уран зураг, гэрэл зургийн бүтээлүүд), зургийн хавтас (зургийн цаас, бөс зэргийг хадгалах хавьс), зургийн хайрцаг (уран зураачийн зугийн хэрэгслийн жижиг сав), зургийн харандаа (зураг зурахад зориулсан харандаа), зургийн хичээл (уран зургийн мэдлэг боловсрол олгодог хичээл), зургийн хуар шиг [шилжсэн] (гоо үзэсгэлэнтэй, гоё чамин), сүг зураг (хад чулуу зэрэгт сийлсэн дүрс зураг), тосон будгийн зураг (тосоор будгаар зурсан зураг), усан будгийн зураг (усанд уусдаг будгаар өнгө ялгаж зурсан зураг), хадны зураг (эрт дээр цагийн хүний хад чулуунд хүн амьтан зэргийг сийлэн гаргасан зураг), хуулбар зураг (дуураймал зураг), шог зураг (үнэн дүрээс хэтрүүлэн, шүүмжилж, шоглож зурсан зураг), гар зураг (оньсон техник хэрэглэлгүйгээр гарын ураар зурсан зураг), зураасан зураг (аливаа юмыг будгаар үл ялган, зураас гаргаж зурсан зураг; зураасан зургийн үзэсгэлэн), хар зураг (а. Будаагүй, сүүдэрлээгүй зураг; б. Тойм зураг), зураг үсэг (дүрс зургаар тэмдэглэсэн үсэг), зураг бичиг (хүн төрөлхтний бичиг үсгийн эртний хэлбэр, зургаар санаагаа илтгэдэг, үсэг болон салдаггүй, тогтмол дуудлагагүй үсэг), дүр зураг [хоршоо] (үзэгдэх зураг), жишээ зураг [хоршоо] (үлгэр загвар зураг), зураг хуар [хоршоо] (хээнцэр ганган, үзэмжтэй сайхан), зураг төлөвлөгөө [хоршоо] (бүтээн байгуулах зүйлийн ерөнхий зураг хийгээд хийхээр төлөвлөсөн зүйл);
--oOo--