Аливаа нэг зүйлийн тухай олон нийтэд зарлан мэдэгдэх, тунхаглан нийтлэх ам мэдээ, бичиг: зар авах (зарласан зүйлийг мэдэх, зар хүлээн авах), зар бичих (олонд зарлах, мэдэгдэхэд зориулан үг, сэдэв бичих), зар тавих (ямар нэг үйл явдлын тухай олонд мэдэгдэн, цуу тараах), зар тараах (зүг зүгт хүн явуулан хэл зар хэлүүлэх, албан ёсны бичиг илгээж зар өгөх) - Га ноёны нэрийг муутгах гэсэн бол зар тараамаар юм. С.Удвал. Их хувь заяа., албан зар (болох зүйлийн талаар албан ёсоор мэдээлэх мэдээ), хуримын зар (хурим болох тухай мэдээ), хурлын зар (хурлын тов), зар бичиг [хоршоо] (бичгээр зарлаж буй товч мэдээ), зар зарлал [хоршоо] (олон нийтийг уриалсан товч мэдээ, мэдээлэл), зар захиа [хоршоо] (зар бичиг) - Зар захиаг завсар засдаг үгүйеэ, хичээн дагаж явагтун. В.Инжаннаши. Хөх судар., зар мэдээ [хоршоо] (олон нийттэй харилцах зорилгоор түгээж буй мэдээний товч хэлбэр), зар сурталчилгаа [хоршоо] (аливаа нэг бараа бүтээгдэхүүн, үйл ажиллагааны сайн талыг олонд танилцуулан мэдээлэх, сурталчлах, хамтран ажиллах, харилцахыг уриалах арга хэлбэр).