1. Малгайн оройд хадах ёнхор, үс, хялгасаар хийсэн улаан цацаг: залаа оёх (малгайн оройн чимэг оёх), залаа хийх (малгайн чимэг урлах), зан зандаа зохидог, залаа малгайдаа зохидог [зүйр цэцэн үг] (аливаа юм өөр өөрийн зүй зохилдлоготой гэсэн санаа) - Залаа бүхий булган малгайд улаан эрдэнэ чулуун жинс эрэгджээ. С.Дашдэндэв. Улаан наран; Малгайн залааг манжаар хэлбэл отго шүү. Дайралцаан;

---

2. Тугийн ишний дээд этгээд, жадны үзүүрт хийх утас хялгас - Гурван сэрээт хар залаа бүхий хадаг яндар болсон туг залжээ. С.Дашдэндэв. Улаан наран;

---

3. Бүдүүн ширхэгтэй ёнхор утас - Зодгийг маш бэх утас, ихэвчлэн залаа мяндсаар товшиж оёлоо. Ж.Дамдин. Монгол бөх;

---

4. Үс, гэзэгний боолт; үс боох тууз - Бага эгч нь дүүгийнхээ годгор гэзгийг самнаж, гурван салаа эрээн залаа зүүж өглөө. С.Дашдэндэв. Улаан наран;

---

5. Зарим амьтны толгой дээрх махлаг эд, өрвөлөг: тахианы залаа (тахианы толгой дээрх өрвөлөг);

---

6. Өвс ургамлын түрүүнд ургах сахал: тарианы залаа (тариан түрүүний сахал өвс), шишийн залаа (шишийн сахал);

---

7. Цэцгийн дэлбийн нэг зүйл: залаа баг цэцэг (залаа багцаг), *залаа нь гозойх (а. Уурлаж омогдох; б. Хүний муу чанар илэрч гарах гэсэн санаа) - Зан нь хувирч залаа нь гозойх. Ж.Дашдорж. Цэцэн үгийн далай.