1. Хоёр үзүүрийг хазаарын зуузайд уясан, морь малыг залах битүү оосор: жолоо барих (а. Морь, малын жолоог атгаж залан явах; б. Жолоо мушгих), жолоо сойх (а. Жолоо богиносгох; б. Хантайрах) - Тавхийтэл мориноосоо бууж, тасхийтэл жолоогоо сойгоод оров. Д.Нацагдорж. Зохиолын түүвэр., жолоо сул тавих (жолоо суллах, дураар давхиулах), жолоо сунгах (жолоо тавин сул тэшүүлэх), жолоо таталгүй (аяарлалгүй), жолоо хумхилгүй (зогсолтгүй) - Таны дуудуулсныг сонсмогц л жолоо хумхихгүй давхиулсаар ирж байгаа нь энэ дээ. Ж.Дамдиндорж. Суварганы нууц., жолоо эргүүлэх (жолоо мушгих), жолоо цулбуур [хоршоо] (морь, малыг залах болон хөтлөх, уях оосор), жолоогоо атгуулах (жолоо шилжүүлэх), жолоогоо сулруулах (жолоогоо султгах), жолоогоо чангалах (жолоогоо чангатгах), суран жолоо (суран цулбуур) - Тэрээр жолоо цулбуураа чанга атган мориныхоо хар хурдаар давхиулав. Л.Түдэв. Нүүдэл., *торгон жолоо өргүүлэх (түрүүлэх);

---

2. Машин, нисэх онгоц, хөдөлгөөнт техникийг чиглүүлэх, залах хэрэгсэл - Жолооч жолоогоо эргүүлэн даваа өөд авирч машиныхаа хүчийг нэмэн пижгэнүүлж, өтгөн хар утаа савсуулан алсын замыг чиглэв. П.Хорлоо. Багш., жолоо барих (удирдах, тэргүүлэх), жолоо залах (чилүүлэн удирдах), жолоо мушгих (автомашиныг залуурдан явуулах), жолооны сургууль хийх (машин барих дадлага хийх);

---

3. [шилжсэн] Төрийг удирдан чиглүүлэх хүч: алтан жолоо (төрийн жолоо), төрийн жолоо (төрийн удирдлага) - Төрийн жолоо барихад чинь бид амь тэмцэн байлдаж тусална гэхэд нь залуу Галдан хүү цааргалж билээ. Б.Ринчен. Гүнж;

---

4. Чиг, зам, хэтийн зорилго: амьдралын жолоо (амьдралын зам) - Амьдралын жолоо шулуухан байдаггүй юм гэдэг энэ байх нь дээ гэж Хүрлээ бодов. П.Хорлоо. Багш., жолоо алдах (а. Жолоогүй болох; б. Бие сэтгэлээ захирч чадахгүй болох) - Хол нутгийн бүсгүйн сайханд сэтгэлийн жолоо алдах дөхөн… С.Эрдэнэ. Ангуучны дууль., сэтгэлийн жолоо (сэтгэлийн тэнцвэр, сэтгэлийн тэнхээ) - Эндүүрч байгаагаа мэдэхгүй болоод сэтгэлийнхээ жолоог сул тавьсан юм. С.Эрдэнэ. Хонгор зул.