Бие сэтгэлийн зовлонгүй, амар амгалан, баясгалантай байдал - Өргүй бол баян, өвчингүй бол жаргал. ААЗ., жаргал даах (амар амгалан, баяр баясгаланг зүй зохистой эдлэх), жаргал эдлэх (амар амгалан, баяр баясгаланг эдлэх), жаргал эрэх (а. Амар амгаланг эрж хайх; б. Биеийн амар, зугаа цэнгэлд дурлах), аз жаргал [хоршоо] (зол жаргал), амар жаргал [хоршоо] (төвшин жаргал), баяр жаргал [хоршоо] (хөөр жаргал), буян жаргал [хоршоо] (аз жаргал), зол жаргал [хоршоо] (тохиол учралын сайн сайхан, баяр баясгалантай нь), цэнгэл жаргал (жаргал цэнгэл); жаргал зовлон [хоршоо] (амьдралын сайн муу юмс үзэгдэл, амар амгалан гай зовлон) - Үүний дотор нэгэн зүйлийн жаргал зовлонг өчүүхэн ч хэрэгсэхгүй хоёр янзын хүн амой. В.Инжаннаши. Хөх судар., жаргал цэнгэл [хоршоо] (баяр баясгалан, баяр цэнгэл) - Сүн хаан нь ордондоо өдөр шөнөгүй жаргал цэнгэлд шунахайран, улс төрийн их засгийн үйлээ хэрэгсэхгүй. В.Инжаннаши. Хөх судар., эрх жаргал [хоршоо] (элдэв дарамт шахалтгүй дураар байдал) - Олон түшмэдийн дээрээ ухаант сэргэлэн гүнж хэмээхэд хүрэх эрхэм дээд эрх жаргалтай аж. В.Инжаннаши. Хөх судар.