1. Өрөөсөн хөлийн гэм согогоос болж, түүнийгээ өргөсхийн жигд бус гишгэн хазганан явахын нэр: доголон мал (хөл нь гэмтсэнээс жигд алхаж чадахгүй болсон мал), доголон морь (хөл нь гэмтсэнээс тэгш явж чадахгүй болсон морь), доголон хүн (хазганан явах хүн), сохор доголон [хоршоо] (харалган болоод хөл муутай байдал, тахир дутуу) - Элдвийн сохор доголон хүмүүс алга тосож хүн бүрээс ганц хоёр мөнгө гуйна. Ц. Дамдинсүрэн. Маршал Чойбалсангийн бага нас., доголон сэглэн [хоршоо] (өрөөсөн урд хөл доголсон амьтан гурван хөлөөр дэгэхээс өөр явдалгүй болсон байдал), сөдөг доголон [хоршоо] (хазгар доголон), *доголон ханчир [амьтан] (хулс зэгсэнд амьдардаг, бие нь харавтар, хажуугаараа улаан зурвастай нэгэн зүйл ханчир шувуу);

---

2. Өрөөсөн, ганц, сондгой: доголон нулимс (нэг хоёрхон дусал нулимс) - Түүний царай гунигтай, нүдэнд нь доголон нулимс хурсныг Найдан ажин өрөвдөх сэтгэл төрөв. Д. Намдаг. Нүгэл буян., доголон нулимстай инээх (нүдэндээ өнчин нулимстай инээх) - Хайрын доголон нулимс хацрыг нь дагаад урсаж билээ. Д.Сэнгээ. Үнэн.